ಮರೆಯದ ಮಾಣಿಕ್ಯ ಅಪ್ಪು ಇಲ್ಲದೆ ಕರುನಾಡಿಗೆ ಅನಾಥ ಭಾವ ಕಾಡ್ತಿದೆ. ಅಪ್ಪು ಬದುಕಿದ್ದಾಗ್ಲೂ ರಾಜಕುಮಾರನಂತೆ ಬಾಳಿದ ಬೆಟ್ಟದ ಹೂ. ಪಿಆರ್ಕೆ ಪ್ರೊಡಕ್ಷನ್ ಮೂಲಕ ಅನೇಕರಿಗೆ ಆಸರೆಯಾದ ಯುವರಾಜ. ಇದೀಗ ನೇತ್ರಾವರಿ ಸೀರಿಯಲ್ ನಿರ್ಮಾಣ ಮಾಡಿದ್ದ ಅಪ್ಪು ಸ್ಮರಣಾರ್ಥವಾಗಿ ಇಡೀ ಸೀರಿಯಲ್ ಟೀಮ್ ಸಮಾಧಿಗೆ ಭೇಟಿ ಕೊಟ್ಟಿದೆ. ಅಪ್ಪು ಇಲ್ಲದ ಈ ಒಂದು ವರ್ಷವನ್ನು ಭಾವುಕರಾಗಿ ನೆನಪು ಮಾಡಿಕೊಂಡಿದ್ದು ಹೀಗೆ.
- ಅಪ್ಪು ಹೆಸರಲ್ಲಿ ಟೀಂನಿಂದ ಪ್ರಶಸ್ತಿ & ಸಾಮಾಜಿಕ ಕಾರ್ಯ
ಕರ್ನಾಟಕ ರತ್ನ, ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ನಮ್ಮನ್ನಗಲಿ ಒಂದು ವರ್ಷ ಉರುಳಿದೆ. ಸದಾ ಅಭಿಮಾನಿಗಳ ಎದೆಯಲ್ಲಿ ಉಸಿರಾಡುತ್ತಿರುವ ಅಪ್ಪು ಎಲ್ಲರ ನೆಚ್ಚಿನ ಆರಾಧ್ಯ ಧೈವವಾಗಿದ್ದಾರೆ. ಅಪ್ಪು ಹೆಸರು ಕೇಳಿದ ತಕ್ಷಣ ಭಾವುಕರಾಗುವ ಅಪ್ಪಟ ಅಭಿಮಾನಿಗಳ ಆಕ್ರಂದನ ಹೇಳತೀರದು. ಇನ್ನು ಪಿಆರ್ಕೆ ಬ್ಯಾನರ್ ಅಡಿಯಲ್ಲಿ ಮೂಡಿ ಬರ್ತಿರೋ ನೇತ್ರಾವತಿ ಸೀರಿಯಲ್ 500 ಎಪಿಸೋಡ್ಗಳನ್ನು ಮುಗಿಸಿದೆ.
ನೇತ್ರಾವತಿ ಸೀರಿಯಲ್ ಯಶಸ್ವಿ 500 ಎಪಿಸೋಡ್ಗಳನ್ನು ಪೂರೈಸಿದ ಸಂಭ್ರಮವನ್ನು ವಿಶಿಷ್ಟವಾಗಿ ಆಚರಿಸಿಕೊಂಡಿದೆ. ಅಪ್ಪು ಸಮಾಧಿಗೆ ಭೇಟಿ ಕೊಟ್ಟು ಪೂಜೆ ಸಲ್ಲಿಸಿತು. ಇಡೀ ದಿನವನ್ನು ದೇವತಾ ಮನುಷ್ಯನಿಗಾಗಿ ಮೀಡಲಿಡಲಾಗಿದೆ. ಸೀರಿಯಲ್ನ ಇಡೀ ತಂಡ ಅಪ್ಪು ಸಮಾಧಿ ಎದ್ರು ಭಾವ ನಮನ ಸಲ್ಲಿಸಿದ್ರು. ಈ ನಡುವೆ ಅಪ್ಪು ಬಗ್ಗೆ ಮಾತಾಡ್ತಾ ಸೀರಿಯಲ್ ನಟಿ ಮಾಲತಿ ತೀವ್ರ ಭಾವುಕರಾಗಿಬಿಟ್ರು.
ಅಪ್ಪುಗೋಸ್ಕರ ಸ್ವತಃ ಸಾಹಿತ್ಯ ರಚಿಸಿ ಮಾಲತಿ ಶ್ರೀ ಮೈಸೂರು ಸಮಾಧಿ ಬಳಿ ಹಾಡಿದ್ದು ಎಲ್ಲರ ಮನಕಲಕುವಂತಿತ್ತು. ಜೊತೆಗೆ ಇಡೀ ಸೀರಿಯಲ್ ಇದಕ್ಕೆ ಸಾಥ್ ನೀಡಿತ್ತು.
ಇನ್ನು ಸಿನಿಮಾದಿಂದ ದೂರ ಉಳಿದಿದ್ದ ನಟಿ ಅಂಜಲಿ ಪಿಆರ್ಕೆ ಪ್ರೊಡಕ್ಷನ್ ಮೂಲಕ ಕಿರುತೆರೆಗೆ ಎಂಟ್ರಿ ಕೊಟ್ರು. ದೊಡ್ಮನೆಗೆ ಆಗಾಗ ವಿಸಿಟ್ ಕೊಡ್ತಿದ್ದ ಸವಿನೆನಪುಗಳನ್ನು ಮೆಲಕು ಹಾಕಿದ್ರು.
ನೇತ್ರಾವತಿ ಸೀರಿಯಲ್ ಬರ್ತಿದೆ. ತಪ್ಪದೆ ನೋಡಿ ಅನ್ನೋ ಅಪ್ಪು ವಾಯ್ಸ್ ಕೇಳಿ ಎಲ್ಲರೂ ಥ್ರಿಲ್ ಆಗಿದ್ವಿ. ಇಂದು ಅವರಿಲ್ಲ. ಅವರ ನೆನಪಲ್ಲಿ ಅನಾಥಾಶ್ರಮದ ಮಕ್ಕಳಿಗೆ ಊಟ ಬಡಿಸಿ ಹೊಸ ಬಟ್ಟೆ ಕೊಟ್ಟು ಗಂಧದಗುಡಿ ಸಿನಿಮಾ ನೋಡ್ತೀದಿವಿ ಎಂದು ಸೀರಿಯಲ್ ಕಲಾವಿದ ಸಂತೋಷ್ ಅಪ್ಪು ಪುಣ್ಯಸ್ಮರಣೆಯ ಕಾರ್ಯಕ್ರಮಗಳ ಬಗ್ಗೆ ಹಂಚಿಕೊಂಡ್ರು.
ಎನಿವೇ, ಅಪ್ಪು ಅವ್ರ ಪ್ರೊಡಕ್ಷನ್ನಲ್ಲಿ ಮೂಡಿ ಬರ್ತಿರೋ ನೇತ್ರಾವತಿ ಇದೇ ರೀತಿ ಧುಮ್ಮಿಕ್ಕಿ ಹರಿಯಲಿ. ಹಲವು ಕಲಾವಿದ್ರಿಗೆ ಆಸರೆ ನೀಡಲಿ. ಜೊತೆಗೆ ಸಾವಿರ ಎಪಿಸೋಡ್ಗಳನ್ನು ಪೂರೈಸಿ ಯಶಸ್ವಿಯಾಗಿ ಮುನ್ನುಗ್ಗಲಿ ಎಂದು ಆಶಿಸೋಣ.
ರಾಕೇಶ್ ಆರುಂಡಿ, ಫಿಲ್ಮ್ ಬ್ಯುರೋ, ಪವರ್ ಟಿವಿ
