ಪಾಕ್​ ವಿರುದ್ಧ ಗೆದ್ದು ಇತಿಹಾಸ ನಿರ್ಮಿಸುತ್ತಾ ಲಂಕಾ?

0
236

ವಿಶ್ವಕಪ್​ ಟೂರ್ನಿಯ ಅಂಕಪಟ್ಟಿಯಲ್ಲಿ 7ನೇ ಸ್ಥಾನದಲ್ಲಿರುವ ಶ್ರೀಲಂಕಾ,8ನೇ ಸ್ಥಾನದಲ್ಲಿರುವ ಪಾಕಿಸ್ತಾನ ಇಂದಿನ ಪಂದ್ಯದಲ್ಲಿ ಮುಖಾಮುಖಿಯಾಗಲಿವೆ. ಟೂರ್ನಿಯಲ್ಲಿ ತಲಾ 1 ಸೋಲು, 1 ಗೆಲುವು ಕಂಡಿರುವ ಉಭಯ ತಂಡಗಳಿಗೂ ಇದು ಪ್ರತಿಷ್ಠೆಯ ಪಂದ್ಯವಾಗಿದೆ. ಜೊತೆಗೆ ಪಂದ್ಯಕ್ಕೆ ಮಳೆ ಅಡ್ಡಿಪಡಿಸುವ ಸಾಧ್ಯತೆ ದಟ್ಟವಾಗಿದೆ.
ಬ್ರೆಸ್ಟಾಲ್​ (Bristol) ಕ್ರಿಕೆಟ್ ಮೈದಾನದಲ್ಲಿ ​​ಪಾಕಿಸ್ತಾನ ಮತ್ತು ಶ್ರೀಲಂಕಾ ನಡುವಿನ ಪಂದ್ಯಕ್ಕೆ ವೇದಿಕೆ ಸಿದ್ಧವಾಗಿದೆ. ಟೂರ್ನಿಯ ತನ್ನ ಮೊದಲ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ 7 ವಿಕೆಟ್ ಗಳ ಹೀನಾಯ ಸೋಲುಂಡಿದ್ದ ಪಾಕ್​, 2ನೇ ಮ್ಯಾಚ್ ನಲ್ಲಿ ಇಂಗ್ಲೆಂಡ್ ವಿರುದ್ಧ 14ರನ್ ಗಳ ಜಯ ಸಾಧಿಸಿದೆ.
ಮೊದಲ ಪಂದ್ಯದಲ್ಲಿ ಬ್ಯಾಟಿಂಗ್​ ವೈಫಲ್ಯ ಕಂಡಿದ್ದ ಪಾಕ್​ ಪಡೆ, ಇಂಗ್ಲೆಂಡ್​​ ವಿರುದ್ಧದ ಪಂದ್ಯದಲ್ಲಿ ಬೌನ್ಸ್​​ ಬ್ಯಾಕ್​ ಮಾಡಿ 348 ರನ್​ ಕಲೆ ಹಾಕಿತ್ತು. ಇದೀಗ ಅದೇ ಆತ್ಮವಿಶ್ವಾಸದಲ್ಲಿ ಸಿಂಹಳೀಯರ ವಿರುದ್ಧ ಹೋರಾಟಕ್ಕಿಳಿಯಲಿದೆ.
ಇತ್ತ ಶ್ರೀಲಂಕಾ ತಂಡವೂ ಟೂರ್ನಿಯ ಮೊದಲ ಪಂದ್ಯದಲ್ಲಿ ನ್ಯೂಜಿಲೆಂಡ್​​ ವಿರುದ್ಧ 10 ವಿಕೆಟ್​​ಗಳ ಹೀನಾಯ ಸೋಲುಂಡಿದೆ. ಆದ್ರೆ ಅಫ್ಘಾನಿಸ್ತಾನ ವಿರುದ್ಧದ 2ನೇ ಪಂದ್ಯದಲ್ಲಿ 5 ವಿಕೆಟ್​​ಗಳ ಜಯ ಸಾಧಿಸಿದೆ. ಈ ಮೂಲಕ ಗೆಲವಿನ ಲಯ ಕಂಡು ಕೊಂಡಿರುವ ಶ್ರೀಲಂಕಾ ಬಳಗ ಇಂದಿನ ಪಂದ್ಯದಲ್ಲೂ ಗೆಲುವನ್ನ ಎದುರು ನೋಡುತ್ತಿದೆ.
ಪಾಕಿಸ್ತಾನ ವಿರುದ್ಧ ವಿಶ್ವಕಪ್​ ಟೂರ್ನಿಯಲ್ಲಿ ಶ್ರೀಲಂಕಾ ಇಲ್ಲಿಯವರೆಗೂ ಒಂದೂ ಜಯ ಸಾಧಿಸಿಲ್ಲ. ವಿಶ್ವಕಪ್​ ಇತಿಹಾಸದಲ್ಲಿ ಲಂಕಾ ಮತ್ತು ಪಾಕ್ 7 ಬಾರಿ ಮುಖಾಮುಖಿ ಆಗಿವೆ. ಈ ಏಳೂ ಪಂದ್ಯಗಳಲ್ಲೂ ಪಾಕಿಸ್ತಾನ ಗೆದ್ದು ಬೀಗಿದೆ. ಹೀಗಾಗಿ ಇಂದಿನ ಪಂದ್ಯದಲ್ಲಿ ಗೆದ್ದು ಇತಿಹಾಸ ಬರೆಯಲು ಸಿಂಹಳೀಯ ಪಡೆ ಸಜ್ಜಾಗಿದೆ.
ಲಂಕಾ ಪರ ನಾಯಕ ದಿಮುತ್​​ ಕರುಣರತ್ನೆ, ಕುಸಲ್​ ಪೆರೆರಾ, ಲಸಿತ್​​ ಮಲಿಂಗ ಹೊರತು ಪಡಿಸಿದ್ರೆ ಉಳಿದೆಲ್ಲಾ ಆಟಗಾರರು ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ವಿಫಲರಾಗಿದ್ದಾರೆ. ಇತ್ತ ಪಾಕ್​ ಪಾಳಯದಲ್ಲಿ ಬ್ಯಾಟ್ಸ್​​ಮನ್​ಗಳು ಪಾರ್ಮ್​ ಕಂಡುಕೊಂಡರೂ, ಆರಂಭಿಕ ಹಾಗೂ ಡೆತ್​ ಓವರ್​​ಗಳಲ್ಲಿ ಬೌಲರ್​ಗಳು ಹೆಚ್ಚು ರನ್​ ಬಿಟ್ಟುಕೊಡುತ್ತಿರುವುದು ನಾಯಕನ ಚಿಂತೆಗೆ ಕಾರಣವಾಗಿದೆ.
ಹೀಗೆ ಸಮಾನ ಗೆಲುವು ಮತ್ತು ಸೋಲು ಕಂಡಿರುವ ಈ ಎರಡೂ ತಂಡಗಳೂ ಗೆಲುವನ್ನು ಎದುರು ನೋಡುತ್ತಿವೆ. ಇನ್ನು ಪಾಕ್​ ವಿರುದ್ಧ ವಿಶ್ವಕಪ್​ ಇತಿಹಾಸದಲ್ಲೇ ಗೆಲ್ಲದ ಶ್ರೀಲಂಕಾ ಒಂದೆಡೆಯಾದ್ರೆ, ಗೆಲುವಿನ ಟ್ರ್ಯಾಕ್​ ಮುಂದುವರೆಸುವ ಒತ್ತಡ ಪಾಕ್​ ಮೇಲಿದೆ. ಏಷ್ಯಾದ ಈ 2 ರಾಷ್ಟ್ರಗಳ ಹಣಾಹಣಿಗೆ ಇಂದು ಬ್ರೆಸ್ಟಾಲ್ (Bristol)​ ಮೈದಾನ ಸಾಕ್ಷಿಯಾಗಲಿದೆ.

LEAVE A REPLY

Please enter your comment!
Please enter your name here