ಗೆಲುವಿನಿಂದ ವಿಶ್ವಕಪ್ ಅಭಿಯಾನವನ್ನು ಶುಭಾರಂಭ ಮಾಡಿರುವ ಅತಿಥೇಯ ಇಂಗ್ಲೆಂಡ್ ಮತ್ತು ಹೀನಾಯ ಸೋಲಿನೊಂದಿಗೆ ಟೂರ್ನಿಯನ್ನು ಆರಂಭಿಸಿರುವ ಪಾಕಿಸ್ತಾನ ಇಂದು ಮುಖಾಮುಖಿ ಆಗಲಿವೆ.
ವಿಶ್ವಕಪ್ ಇತಿಹಾಸದಲ್ಲಿ ಒಮ್ಮೆಯೂ ಚಾಂಪಿಯನ್ ಪಟ್ಟ ಅಲಂಕರಿಸಲು ಸಾಧ್ಯವಾಗಿಲ್ಲ ಎನ್ನುವ ಕೊರಗಿನಲ್ಲಿರುವ ಇಯಾನ್ ಮಾರ್ಗನ್ ನಾಯಕತ್ವದ ಇಂಗ್ಲೆಂಡ್ ತವರಿನಲ್ಲಿ ಪ್ರಶಸ್ತಿಗೆ ಮುತ್ತಿಕ್ಕುವ ಆತ್ಮವಿಶ್ವಾಸದಲ್ಲಿದೆ. ಅದಕ್ಕೆ ತಕ್ಕಂತೆ ಟೂರ್ನಿಯಲ್ಲಿ ಶುಭಾರಂಭ ಮಾಡಿ, ಎರಡನೇ ಪಂದ್ಯಕ್ಕೆ ಸಜ್ಜಾಗಿದೆ.
ಮೊದಲ ಅಭ್ಯಾಸ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ 12ರನ್ ಗಳಿಂದ ಸೋತಿದ್ದ ಇಂಗ್ಲೆಂಡ್, ಎರಡನೇ ಅಭ್ಯಾಸ ಪಂದ್ಯದಲ್ಲಿ ಅಪ್ಘಾನಿಸ್ತಾನದ ವಿರುದ್ಧ 9 ವಿಕೆಟ್ಗಳ ಅಧಿಕಾರಯುತ ಗೆಲುವನ್ನು ಪಡೆಯುವುದರ ಮೂಲಕ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡು ವಿಶ್ವಕಪ್ ಗೆ ಸನ್ನದ್ಧವಾಯಿತು.
ಬಳಿಕ ಮೇ 30ರಂದು ದಿ ಓವೆಲ್ ಮೈದಾನದಲ್ಲಿ ನಡೆದ ಉದ್ಘಾಟನಾ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 104ರನ್ ಗಳಿಂದ ಭರ್ಜರಿಯಾಗಿ ಗೆದ್ದು ಬೀಗಿದ್ದು, ಇಂದು 2ನೇ ಮ್ಯಾಚ್ಗೆ ರೆಡಿಯಾಗಿದೆ.
ಆದರೆ, ಪಾಕಿಸ್ತಾನದ ಸ್ಥಿತಿ ಇಂಗ್ಲೆಂಡ್ ಗಿಂತ ವಿಭಿನ್ನ. ಯಾಕೆಂದರೆ ಚೊಚ್ಚಲ ಅಭ್ಯಾಸ ಪಂದ್ಯದಲ್ಲಿ ಕ್ರಿಕೆಟ್ ಶಿಶು ಅಫ್ಘಾನಿಸ್ತಾನದ ವಿರುದ್ಧ 3 ವಿಕೆಟ್ ಗಳಿಂದ ಸೋತು ಅವಮಾನ ಎದುರಿಸಿತ್ತು. ಬಾಂಗ್ಲಾ ವಿರುದ್ಧ ನಡೆಯಬೇಕಿದ್ದ 2ನೇ ಪ್ರಾಕ್ಟೀಸ್ ಮ್ಯಾಚ್ ಮಳೆಯಿಂದ ರದ್ದಾಯಿತು. ಆಗಿದ್ದಾಗಲಿ, ಸರಣಿಯನ್ನು ಶುಭಾರಂಭ ಮಾಡೋಣ ಅಂತಿದ್ದ ಪಾಕ್ ನಾಟಿಂಗ್ ಹ್ಯಾಮ್ ನಲ್ಲಿ ನಡೆದ ತನ್ನ ಮೊದಲ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ 47 ವಿಕೆಟ್ ಗಳ ಹೀನಾಯ ಸೋಲುಂಡಿತು.
ಹೀಗಾಗಿ ಇಂದಿನ ಪಂದ್ಯ ಗೆದ್ದವರ ಮತ್ತು ಸೋತವರ ನಡುವಿನ ಕಾಳಗವಾಗಲಿದೆ. ವಿಶ್ವಕಪ್ ಇತಿಹಾಸವನ್ನು ನೋಡಿದ್ರೆ ಪಾಕ್ ಮತ್ತು ಇಂಗ್ಲೆಂಡ್ ಸಮಬಲದ ಹೋರಾಟವನ್ನು ನಡೆಸಿವೆ. ಇದುವರೆಗೆ ಒಟ್ಟು 9 ಬಾರಿ ಮುಖಾಮುಖಿಯಾಗಿರುವ ಈ ಎರಡು ತಂಡಗಳು ತಲಾ 4 ಪಂದ್ಯಗಳಲ್ಲಿ ಗೆದ್ದಿವೆ. ಒಂದು ಪಂದ್ಯ ಮಾತ್ರ ಫಲಿತಾಂಶ ಬಂದಿಲ್ಲ.
ಪಾಕಿಸ್ತಾನ 1992ರಲ್ಲಿ ವಿಶ್ವಕಪ್ ಗೆದ್ದಿತ್ತು. 1999ರಲ್ಲಿ ರನ್ನರ್ ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟಿತ್ತು. ಇಂಗ್ಲೆಂಡ್ 1979, 1987 ಮತ್ತು 1992ರಲ್ಲಿ ರನ್ನರ್ ಅಪ್ ಆಗಿದ್ದು ಬಿಟ್ಟರೆ ಇದುವರೆಗೆ ಚಾಂಪಿಯನ್ ಆಗಿಲ್ಲ.
ಇಂದಿನ ಪಂದ್ಯದ ಬಲಾಬಲ ನೋಡೋದಾದ್ರೆ, ಇಂಗ್ಲೆಂಡ್ ಪಾಕ್ ಗಿಂತ ತುಂಬಾನೇ ಸ್ಟ್ರಾಂಗ್ ಇದೆ. ಸೌತ್ ಆಫ್ರಿಕಾ ವಿರುದ್ಧದ ಪಂದ್ಯದಲ್ಲಿ ಅರ್ಧಶತಕ ಬಾರಿಸಿ ಮಿಂಚಿದ ಜಾಸನ್ ರಾಯ್, ಜಾಯ್ ರೂಟ್, ನಾಯ ಇಯಾನ್ ಮಾರ್ಗನ್, ಆಲ್ ರೌಂಡಿಂಗ್ ಪರ್ಫಾರ್ಮೆನ್ಸ್ ನೀಡಿ ಪಂದ್ಯ ಪುರುಷ ಪ್ರಶಸ್ತಿಗೆ ಭಾಜನರಾಗಿದ್ದ ಬೆನ್ಸ್ಟ್ರೋಕ್ ಈ ಪಂದ್ಯದಲ್ಲೂ ಆರ್ಭಟಿಸೋ ನಿರೀಕ್ಷೆ ಇದೆ. ಜಾನಿ ಬೈರ್ಸ್ಟೋ, ಬಟ್ಲರ್ ಫಾರ್ಮ್ ಗೆ ಮರಳೋ ನಿರೀಕ್ಷೆ ಇದೆ. ಬೌಲಿಂಗ್ ನಲ್ಲಿ ಜೋಫರ್ ಆರ್ಚರ್, ಅದಿಲ್ ರಶೀದ್. ಲ್ಯಾಮ್ ಪ್ಲಂಕೆಟ್ ಮೊಯಿನ್ ಅಲಿ ಬಲವಿದೆ. ಜೊತೆಗೆ ಮೊದಲೇ ಹೇಳಿರುವಂತೆ ಬೆನ್ ಸ್ಟ್ರೋಕ್ ಬೌಲಿಂಗ್ ನಲ್ಲೂ ಮಿಂಚಿದ್ದಾರೆ.
ಆದರೆ, ಗಾಯಗೊಂಡಿರುವ ಪಾಕಿಸ್ತಾನವನ್ನು ಇಂಗ್ಲೆಂಡ್ ಸುಲಭದಲ್ಲಿ ಪರಿಗಣಿಸುವಂತಿಲ್ಲ. ಬ್ಯಾಟಿಂಗ್ ವಿಭಾಗದಲ್ಲಿ ಓಪನರ್ ಗಳಾದ ಇಮಾಮ್ ಉಲ್ ಹಕ್, ಫಕರ್ ಜಮಾನ್ ಕ್ಲಿಕ್ ಆದ್ರೆ ಇಂಗ್ಲೆಂಡ್ ಬೌಲರ್ ಗಳಿಗೆ ಸಿಂಹ ಸ್ವಪ್ನವಾಗಿ ಕಾಡಲಿದ್ದಾರೆ. ಅಷ್ಟೇ ಅಲ್ಲದೆ ಬಾಬರ್ ಅಜಾಮ್, ಹ್ಯಾರಿಸ್ ಸೊಹೈಲ್ ನೆಲಕಚ್ಚಿ ಆಡಿದ್ರೆ ರನ್ ಮಳೆ ಸುರಿಯೋದಂತು ಗ್ಯಾರೆಂಟಿ. ಮೊಹಮ್ಮದ್ ಅಮಿರ್, ವಹಾಬ್ ರಿಯಾಜ್, ಹಸನ್ ಅಲಿ ಮೇಲೆ ನಿರೀಕ್ಷೆ ಇದ್ದು, ಒಟ್ನಲ್ಲಿ ಜಿದ್ದಾಜಿದ್ದಿನ ಹೋರಾಟಕ್ಕೆ ಟ್ರೆಂಟ್ ಬ್ರಿಡ್ಜ್ ಸ್ಟೇಡಿಯಂ ಸಾಕ್ಷಿಯಾಗಲಿದೆ.
