ಮಂಗಳೂರು: ‘ರವಿ ಕಾಣದ್ದನ್ನ ಕವಿ ಕಂಡ’ ಅನ್ನೋ ಮಾತಿದೆ. ಹಾಗೆಯೇ ಮಂಗಳೂರಿನ ಹವ್ಯಾಸಿ ಛಾಯಾಚಿತ್ರಗ್ರಾಹಕರೊಬ್ಬರು ತನ್ನ ಕ್ಯಾಮೆರಾ ಕಣ್ಣಲ್ಲಿ ಪ್ರಕೃತಿಯಲ್ಲೇ ಗಣಪನನ್ನ ಕಂಡಿದ್ದಾರೆ. ಅವರು ಕಂಡ ನೈಸರ್ಗಿಕ ಗಣಪ ಇದೀಗ ಕಡಲನಗರಿಯೇ ನಮಿಸುವಂತೆ ಮಾಡಿದೆ. ಪ್ರಕೃತಿದತ್ತವಾಗಿ ಮರ-ಗಿಡ, ಪೊದೆಗಳಿಂದ ರೂಪಿತವಾದ ಪ್ರಥಮ ಪೂಜಿತನು ಇಲ್ಲಿ ಅತೀ ಎತ್ತರದಲ್ಲಿ ಪ್ರತಿಷ್ಠಾಪಿಸಿದಂತೆ ಕಂಡು ಬರುತ್ತಿದ್ದಾನೆ. ಆದರೆ ಯಾರ ಗಮನಕ್ಕೂ ಬಾರದಿದ್ದ ಈ ಪ್ರಕೃತಿ ಗಣಪನನ್ನ ಹವ್ಯಾಸಿ ಛಾಯಾಚಿತ್ರಗ್ರಾಹಕ ವಿಶಾಲ್ ವಾಮಂಜೂರು ತನ್ನ ಕ್ಯಾಮೆರಾದಲ್ಲಿ ಸೆರೆ ಹಿಡಿದು ಎಲ್ಲರಿಗೂ ಪ್ರಕೃತಿ ವಿಸ್ಮಯ ಗೊತ್ತಾಗುವಂತೆ ಮಾಡಿದ್ದಾರೆ.
ಚೌತಿ ಹಬ್ಬದ ದಿವಸವೇ ಕಂಡುಬಂದ ಈ ವಿಸ್ಮಯ ಕಂಡು ಕರಾವಳಿಯ ಜನ ಭಾವಪರವಶರಾಗಿದ್ದಾರೆ. ವಿಶಾಲ್ ವಾಮಂಜೂರು ಅವರ ಫೋಟೋ ವೈರಲ್ ಆಗುತ್ತಿದ್ದಂತೆ ಜನರು ವಾಮಂಜೂರಿನ ಕೆತ್ತಿಕಲ್ಗೆ ಆಗಮಿಸಿ ಪ್ರಕೃತಿದತ್ತ ಗಣಪನಿಗೆ ಭಕ್ತಿಪೂರ್ವಕವಾಗಿ ನಮಿಸುತ್ತಿದ್ದಾರೆ. ಸದ್ಯ ವಿಶಾಲ್ ಅವರ ಫೋಟೋ ಜಾಲತಾಣದಲ್ಲಿ ಟ್ರೆಂಡ್ ಕ್ರಿಯೇಟ್ ಮಾಡಿದ್ದು, ಇನ್ನಿತರ ಫೋಟೋಗ್ರಾಫರ್ ಗಳು ಕೂಡ ತಮ್ಮ ಕ್ಯಾಮೆರಾದಲ್ಲಿ ಈ ಪ್ರಕೃತಿ ಗಣಪನನ್ನ ಇನ್ನಷ್ಟು ವಿಭಿನ್ನವಾಗಿ ಸೆರೆ ಹಿಡಿಯುವ ಪ್ರಯತ್ನ ಮಾಡಿದ್ದಾರೆ.
-ಇರ್ಷಾದ್ ಕಿನ್ನಿಗೋಳಿ
