82ರ ಈ ಅಜ್ಜಿ ವಿಶ್ವದ ಅತ್ಯಂತ ಹಿರಿಯ ಆಪ್ ಡೆವಲಪರ್..!

0
160

ಟ್ಯಾಲೆಂಟ್ ಅನ್ನೋದು ಯಾರ ಸ್ವತ್ತಲ್ಲ ಅದಕ್ಕೆ ವಯಸ್ಸಿನ ಮಿತಿಯೂ ಇಲ್ಲ. ಮನಸ್ಸು ಮಾಡಿ ಪ್ರಯತ್ನಿಸಿದ ಯಾರು ಬೇಕಾದ್ರೂ ಸಾಧನೆಯ ಶಿಖರವನ್ನ ಹತ್ತಬಹುದು. ನಿಶ್ಚಲ ಮನಸ್ಥಿತಿ, ಮಾಡೇ ಮಾಡುತ್ತೇನೆ ಎನ್ನುವ ಅತ್ಮಸ್ಥೈರ್ಯ, ಎಂತಹ ಪರಿಸ್ಥಿತಿಯೇ ಇರಲಿ ಮುನ್ನುಗ್ಗುವ ಉತ್ಸಾಹವಿದ್ದ ಯಾರಾದ್ರೂ ಸರಿಯೇ ಸಾಧಿಸಬಹುದು. ಅದು 60ರ ಅಜ್ಜಿಯೇ ಆಗಿರಬಹುದು.., 3 ವರ್ಷದ ಬಾಲಕನೇ ಆಗಿರಬಹುದು..!
ಇದೇ ರೀತಿ ವಯಸ್ಸಿನ ಅಂತರವನ್ನು ಮೀರಿ.., ಇಳಿ ವಯಸ್ಸಿನಲ್ಲಿ ಇಡೀ ಜಗತ್ತೇ ತಿರುಗಿ ನೋಡುವಂತಹ ಸಾಧನೆ ಮಾಡಿದ್ದಾರೆ  ಹಿರಿಯಜ್ಜಿ ಒಬ್ಬರು. ಅಂದಹಾಗೆ ಆ ಅಜ್ಜಿ ವಯಸ್ಸು ಬರೋಬ್ಬರಿ 82 ವರ್ಷ. ಆದ್ರೂ ಕೂಡ ಪುಟಿದೇಳುತ್ತಿರುವ ಉತ್ಸಾಹ. ಯುವಕರನ್ನು ನಾಚಿಸುವಂತಹ ವಾಕ್ ಚಾತುರ್ಯ… ಮಾತ್ತೇನ್ನನ್ನೋ ಸಾಧಿಸಿಬೇಕು ಎನ್ನುವ ಹಂಬಲ… ಬಿಸಿ ರಕ್ತದ ಯುವಕರು ಅವ್ರನ್ನು ನೋಡಿ ನಿಜವಾಗಿಯೂ ಕಲಿಯಬೇಕಿದೆ.
ಅಂದಹಾಗೆ ಅವರ ಹೆಸರು ಮಸಾಕೋ ವಕಾಮಿಯಾ. ವಿಶ್ವದ ಅತ್ಯಂತ ಹಿರಿಯ ಆಪ್ ಡೆವಲಪರ್. ಅದು ಕೂಡ ಐಫೋನ್ ಆಪ್ ಡೆವಲಪ್ ಮಾಡುವುದರಲ್ಲಿ ಇವ್ರು ನಿಸ್ಸೀಮರು. ಅಷ್ಟೇ ಅಲ್ಲದೇ ಆಪಲ್ ಆಯೋಜಿಸಿರುವ ಐಫೋನ್ ಡೆವಲಪರ್​ ಜಾಗತಿಕ ಸಮಾವೇಶಕ್ಕೆ ಆಹ್ವಾನಿತರು ಆಗಿದ್ದರು.
ಅಬಾಕಸ್ ಮೂಲಕ ಗಣಿತ ಕಲಿತ ಮಸಾಕೋ ವಕಾಮಿಯಾ ಅವ್ರು ಇಡೀ ಜಗತ್ತೇ ನಿಬ್ಬೆರರಾಗಿ ನೋಡುವಂತೆ ಮಾಡಿದ್ದಾರೆ. ಅಬ್ಬಾ..! 82 ವರ್ಷದ ಅಜ್ಜಿ ಇದನ್ನೆಲ್ಲಾ ಮಾಡಲು ಸಾಧ್ಯವಾ ಅಂತ ಒಂದ್ಸಲ ನಮಗೆ ಅನ್ನಿಸುತ್ತೆ. ಆದರೆ ಸಾಧಿಸಿ ತೋರಿಸಿದ್ದಾರೆ ಈ ಅಜ್ಜಿ. ಈ ರೀತಿಯ ಆ್ಯಪ್ ಡೆವಲಪ್ ಮಾಡುವುದರ ಮೂಲಕ ಹಿರಿಯರಿಗೆ ಅನುಕೂಲವಾಗುವಂತೆ ಮಾಡಿದ್ದಾರೆ.
ಸಾಧಾರಣವಾಗಿ ವಯಸ್ಸು 60 ಆದ್ರೆ ಸಾಕು ಕೆಲವ್ರು ಜೀವನದಲ್ಲಿ ಆಸಕ್ತಿ, ಉತ್ಸಾಹ ಕಳೆದುಕೊಂಡು ಬಿಡುತ್ತಾರೆ. ಆದ್ರೆ ಈ ಸಮಯದಲ್ಲಿಯೇ ನಾವು ಇನ್ನೂ ಉತ್ಸಾಹದಿಂದಿರಬೇಕು ಎನ್ನುವ ಸಲಹೆ ನೀಡ್ತಾರೆ ಮೆಸಾಕೋ ಅವ್ರು.
ಅಸಲಿಗೆ ಮಸಾಕೋ ಮತ್ತು ಕಂಪ್ಯೂಟರ್ ನಂಟು ಶುರುವಾಗಿದ್ದು 1990ರಲ್ಲಿ. ಬ್ಯಾಂಕ್‍ನಲ್ಲಿ ಗುಮಾಸ್ತೆಯಾಗಿ ಕಾರ್ಯನಿರ್ವಹಿಸುತ್ತಿದ್ದ ಇವ್ರು ನಿವೃತ್ತಿಯಾದ ನಂತರ ಎಲ್ಲರಂತೆ ಮನೆಯಲ್ಲಿ ಸುಮ್ಮನೆ ಕೂರಲಿಲ್ಲ. ಏನಾದ್ರೂ ಒಂದು ಸಾಧಿಸಬೇಕು ಎನ್ನುವ ತುಡಿತ ಸದಾ ಇವರಲ್ಲಿ ಕಾಡ್ತಾ ಇತ್ತು. ಹಾಗಾಗಿಯೇ ಕಂಪ್ಯೂಟರ್ ಮೇಲೆ ತೀವ್ರ ಆಸಕ್ತಿಯನ್ನ ಬೆಳೆಸಿಕೊಂಡರು. ನಂತರ ಅದ್ರ ಅಧ್ಯಯನವನ್ನು ಕೂಡ ಕೈಗೊಂಡರು. ಅಲ್ಲಿಂದ ಇಲ್ಲಿಯವರೆಗೆ ನಿರಂತರ ಅಧ್ಯಯನದ ಜೊತೆಗೆ ಆಪ್ ಡೆವಲಪ್‍ಮೆಂಟ್‍ನಲ್ಲಿ ತೊಡಗಿದ್ದಾರೆ ಮಸಾಕೋ ವಕಾಮಿಯಾ.
ಇನ್ನು ಮೆಸಾಕೋ ಅವ್ರು ಮಾಡಿರುವ ಹಿನಾದಾನ್ ಸೇರಿ ಬಹುತೇಕ ಆಪ್‍ಗಳು ಹಿರಿಯರನ್ನ ಗಮನದಲ್ಲಿರಿಸಿಕೊಂಡು ಅಭಿವೃದ್ಧಿ ಪಡಿಸಲಾಗಿವೆ. ಈ ಆಪ್‍ಗಳು ಹಿರಿಯರಿಗೆ ತುಂಬಾನೇ ಅನುಕೂಲವಾಗುವುದರ ಜೊತೆಗೆ ಜನಪ್ರೀಯವಾಗಿವೆ ಎಂಬುವುದನ್ನು ಗಮನಿಸಬಹುದಾದ ಸಂಗತಿ.
ತಮ್ಮ 82ನೇ ವಯಸ್ಸಿನಲ್ಲಿಯೂ ಪುಟಿದೇಳುವ ಉತ್ಸಾಹ ಹೊಂದಿರುವ ವಕಾಮಿಯಾ ಅವ್ರನ್ನ ನೋಡಿದ್ರೆ ನಿಜಕ್ಕೂ ಅಚ್ಚರಿಯಗುತ್ತೆ. ತಮ್ಮ 75ನೇ ವಯಸ್ಸಿಲ್ಲಿ ಪಿಯಾನೋ ಕಲಿತ ಇವ್ರ ತುಡಿತ, ಮತ್ತಷ್ಟು ಸಾಧಿಸಬೇಕು ಎನ್ನುವ ಹಂಬಲ ನಿಜಕ್ಕೂ ಮಾದರಿಯಾಗಿದೆ. ಈ 82ರ ವಯಸ್ಸಲ್ಲೂ ಇಂಥಾ ಉತ್ಸಾಹ ಇರೋ ಮಸಾಕೋ ವಕಾಮಿಯಾರಿಗೆ ನಮ್ಮದೊಂದು ಸಲಾಂ.

LEAVE A REPLY

Please enter your comment!
Please enter your name here