ಧಾರವಾಡ: ಮಾನವನ ಹೇಡಿತನದ ಕೃತ್ಯಕ್ಕೆ ಬಲಿಯಾದ ಗಜ ಮಾತೆಗೆ ವಿಶಿಷ್ಟ ರೀತಿಯಲ್ಲಿ ಧಾರವಾಡ ಪ್ರಖ್ಯಾತ ಕಲಾವಿದ ಮಂಜುನಾಥ ಹಿರೇಮಠ್ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ.
ಕೇರಳದಲ್ಲಿ ನಡೆದ ಆನೆ ಹತ್ಯೆ ಖಂಡಿಸಿ, ಮಣ್ಣಿನಿಂದ ಆನೆ ಹಾಗೂ ಗರ್ಭದಲ್ಲಿದ್ದ ಮರಿ ಆನೆ ಕಲಾಕೃತಿ ಮಾಡಿ ವಿಶಿಷ್ಟ ರೀತಿಯಲ್ಲಿ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ.
ಕೇರಳದ ಮಲಪ್ಪುರಂನಲ್ಲಿ ಹಸಿವಿಗೆ ಕಾಡಿನಿಂದ ಆಹಾರ ಹರಸುತ್ತಾ ಬಂದ ಗರ್ಭಿಣಿ ಆನೆ ಊರು ಸೇರಿತ್ತು. ಆದರೆ ಅಲ್ಲಿ ಕೆಲವು ಪಾಪಿ ಜನ ತಮ್ಮ ತಮಾಷೆಯ ಚಟ ತೀರಿಸಿಕೊಳ್ಳಲು ಹಸಿದು ಬಂದ ಆನೆಗೆ ಪೈನಾಪಲ್ನ ಒಳಗೆ ಸಿಡಿಮದ್ದು ಸೇರಿಸಿ ಕೊಟ್ಟಿದ್ದರು. ಅದನ್ನು ತಿಳಿಯದ ಆ ಗರ್ಭಿಣಿ ಗಜಮಾತೆ ಪೈನಾಪಲ್ ತಿಂದು ತನ್ನ ಪ್ರಾಣವನ್ನು ಕಳೆದುಕೊಂಡಿತ್ತು. ಇನ್ನೂ ಭೂಮಿಗೆ ಕಾಲಿಡದ ಪುಟ್ಟ ಮರಿ ಆನೆಯೂ ಮಾನವನ ಹೀನ ಕೃತ್ಯಕ್ಕೆ ಬಲಿಯಾಯಿತು.
