ಜೋರಾಗಿ ಸಾಗಿದೆ ಕನ್ನಡದ ತೇರು. ಆ ವೈಭವ ನೋಡೋದೇ ನಯನಗಳಿಗೆ ತಂಪು, ಕಿವಿಗಳಿಗೆ ಇಂಪು. ಒಂದ್ಕಡೆ ರಾಕಿಭಾಯ್ ಬಾಕ್ಸ್ ಆಫೀಸ್ ರೂಲ್ ಮಾಡ್ತಿದ್ರೆ, ಮತ್ತೊಂದ್ಕಡೆ ಪವರ್ ಸ್ಟಾರ್ ಪುನೀತ್ ಕಂಬ್ಯಾಕ್ ಮಾಡ್ತಿದ್ದಾರೆ. ಅದೂ ಅದೇ ಪವರ್ ವಾಯ್ಸ್ನಿಂದ.
ಅಪರಂಜಿಯಂತಹ ಗುಣದ ಸ್ಯಾಂಡಲ್ವುಡ್ನ ದೊಡ್ಮನೆಯ ಅರಸ ಅಪ್ಪು ಅಗಲಿಕೆಯ ನೋವು ಇನ್ನೂ ಅಭಿಮಾನಿಗಳನ್ನು ಕಾಡ್ತಿದೆ. ಆ ದುಃಖ ಎಂದಿಗೂ ಹಾಗೆಯೇ ಇರುತ್ತೆ. ಆದ್ರೆ ಅದನ್ನು ಮರೆಮಾಚಿದ್ದು ಡಾ.ಪುನೀತ್ ರಾಜ್ಕುಮಾರ್ ನಟನೆಯ ಕೊನೆಯ ಸಿನಿಮಾ ಜೇಮ್ಸ್. ಅಪ್ಪು ಬರ್ತ್ಡೇಗೆ ಪ್ಯಾನ್ ಇಂಡಿಯಾ ಲೆವೆಲ್ನಲ್ಲಿ ತೆರೆಗಪ್ಪಳಿಸಿದ್ದ ಈ ಚಿತ್ರವನ್ನು ಅಭಿಮಾನಿ ದೇವರುಗಳು ಹಬ್ಬದಂತೆ ಆಚರಿಸಿ ಅದ್ಧೂರಿಯಾಗಿ ಸ್ವಾಗತಿಸಿದ್ರು.
ದೊಡ್ಡ ಪರದೆ ಮೇಲೆ ಅಗಲಿದ ಅಪ್ಪು ಅವ್ರನ್ನು ಜೇಮ್ಸ್ ಅವತಾರದಲ್ಲಿ ಕಂಡು ಭಾವುಕರಾಗಿಯೇ ಚಿತ್ರವನ್ನು ಕಣ್ತುಂಬಿಕೊಂಡು ಸಂತಸ ಪಟ್ರು. ಪವರ್ ಸ್ಟಾರ್ ಸಿನಿಮಾ ವಿಶ್ವದಾದ್ಯಂತ ಜೇಮ್ಸ್ ಸೂಪರ್ ಹಿಟ್ ಆಗಿದ್ದಲ್ಲದೆ ಕೇವಲ ನಾಲ್ಕೇ ದಿನಗಳಲ್ಲಿ ನೂರು ಕೋಟಿ ಕ್ಲಬ್ ಸೇರಿ ಬಾಕ್ಸ್ ಆಫೀಸ್ ಕಲೆಕ್ಷನ್ನಲ್ಲೂ ಹೊಸ ದಾಖಲೆ ಬರೆಯಿತು. ಇತ್ತೀಚೆಗೆ ಏಪ್ರಿಲ್ 14 ರಂದು ಓಟಿಟಿಗೂ ಜೇಮ್ಸ್ ಚಿತ್ರ ಲಗ್ಗೆ ಇಟ್ಟಿದ್ದು ಅಲ್ಲಿಯೂ ಹೆಚ್ಚು ವ್ಯೂವ್ಸ್ ಪಡೆದುಕೊಳ್ತಿದೆ.
ಜೇಮ್ಸ್ ಸಿನಿಮಾ ಕಂಪ್ಲೀಟ್ ಆಗೋ ಮೊದಲೇ ಅಪ್ಪು ನಮ್ಮನ್ನು ಬಿಟ್ಟು ಹೋದ ಕಾರಣ ಹೊಸ ತಂತ್ರಜ್ಞಾನದ ಮೂಲಕ ಅಪ್ಪು ಅವ್ರ ಧ್ವನಿಯನ್ನು ರಿಕ್ರಿಯೇಟ್ ಮಾಡಲು ಚಿತ್ರತಂಡ ಪ್ರಯತ್ನಿಸಿತ್ತಾದ್ರೂ ಅದು ಸಾಧ್ಯವಾಗಿರ್ಲಿಲ್ಲ. ಆಗ ಶಿವಣ್ಣ ಡಬ್ ಮಾಡಿ ಅಪ್ಪು ಪಾತ್ರದ ತೂಕವನ್ನು ಹೆಚ್ಚಿಸಿದ್ರು. ಆದ್ರೂ ಜೇಮ್ಸ್ ಚಿತ್ರದಲ್ಲಿ ಅಪ್ಪು ರೋಲ್ಗೆ ಅವ್ರ ಧ್ವನಿ ಇಲ್ಲದೆ ಇದ್ದದ್ದು ಎಲ್ಲಾ ಅಭಿಮಾನಿಗಳಲ್ಲೂ ಬೇಸರ ಮೂಡಿಸಿತ್ತು. ಆ ವಿಚಾರದಲ್ಲಿ ಸದ್ಯ ಅಭಿಮಾನಿಗಳಿಗೆ ಸಿಹಿ ಸುದ್ದಿ ಸಿಕ್ಕಿದೆ.
ಜೇಮ್ಸ್ ಸಿನಿಮಾ ತೆರೆಕಂಡು ಸದ್ಯ 25 ದಿನಗಳನ್ನು ಪೂರೈಸಿ ವರ್ಲ್ಡ್ವೈಡ್ ಸುಮಾರು 200 ಕೋಟಿಗೂ ಹೆಚ್ಚು ಕಲೆಕ್ಷನ್ ಮಾಡೋ ಮೂಲಕ ಎಲ್ಲೆಡೆ ಯಶಸ್ವೀ ಪ್ರದರ್ಶನ ಕಾಣ್ತಿದೆ. ಅಲ್ಲದೆ ಇದೀಗ ಹೊಸ ತಂತ್ರಜ್ಞಾನದ ಮೂಲಕ ಅಪ್ಪು ಪಾತ್ರಕ್ಕೆ ಅವ್ರದ್ದೇ ಧ್ವನಿಯನ್ನು ಅಳವಡಿಸಲಾಗಿದ್ದು, ಡಾ.ರಾಜ್ಕುಮಾರ್ ಹುಟ್ಟುಹಬ್ಬದ ವಿಶೇಷತೆಯಲ್ಲಿ ಏಪ್ರಿಲ್ 22ರಂದು ಜೇಮ್ಸ್ ಚಿತ್ರವನ್ನು ರೀರಿಲೀಸ್ ಮಾಡಲು ಚಿತ್ರತಂಡ ರೆಡಿಯಾಗಿದೆ. ಸುದ್ದಿಗೋಷ್ಟಿ ಮೂಲಕ ಚಿತ್ರತಂಡ ಈ ವಿಚಾರವನ್ನು ಸ್ಪಷ್ಟಪಡಿಸಿದೆ.
ಟಾಲಿವುಡ್ ಇಂಡಸ್ಟ್ರಿಯಲ್ಲಿ ಕಳೆದ 25 ವರ್ಷಗಳಿಂದ ಕೆಲಸ ಮಾಡಿರೋ ಹೈದರಾಬಾದ್ನ ಪಪ್ಪು ಅಲಿಯಾಸ್ ಶ್ರಿನಿವಾಸ್ ರಾವ್ ಸೌಂಡ್ ಇಂಜಿನಿಯರ್ ತಂಡ ಹೆಚ್ಚು ಹಾರ್ಡ್ವರ್ಕ್ ಮಾಡಿ ಜೇಮ್ಸ್ ಸಿನಿಮಾದಲ್ಲಿ ಅಪ್ಪು ಪಾತ್ರಕ್ಕೆ ಅವ್ರ ಒರಿಜಿನಲ್ ಧ್ವನಿಯನ್ನು ಅಳವಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ವಿಶ್ವದಲ್ಲೇ ಮೊದಲ ಬಾರಿಗೆ ವಾಯ್ಸ್ ರೀಕ್ರಿಯೇಶನ್ ಮಾಡಿರೋ ಸಿನಿಮಾ ನಮ್ಮ ಕನ್ನಡದ ಜೇಮ್ಸ್ ಚಿತ್ರ ಅನ್ನೋದು ನಿಜಕ್ಕೂ ಹೆಮ್ಮೆಯ ವಿಚಾರ.
ಇನ್ನೂ ಏಪ್ರಿಲ್ 22ಕ್ಕೆ ಅಪ್ಪು ಧ್ವನಿಯೊಂದಿಗೆ ಜೇಮ್ಸ್ ಚಿತ್ರ ಈಗಿರುವ ಚಿತ್ರಮಂದಿಗಳ ಜೊತೆಗೆ ಇನ್ನೂ 125ಕ್ಕೂ ಹೆಚ್ಚು ಥಿಯೇಟರ್ಗಳಲ್ಲಿ ಕನ್ನಡ ವರ್ಷನ್ ಜೇಮ್ಸ್ ಮರುಬಿಡುಗಡೆಯಾಗಲಿದೆ. ಒಟ್ಟಾರೆ ಪುನೀತ್ ರಾಜ್ಕುಮಾರ್ ಪವರ್ಫುಲ್ ವಾಯ್ಸ್ನಲ್ಲಿ ಮತ್ತೆ ಥಿಯೇಟರ್ಗಳಲ್ಲಿ ಅಭಿಮಾನಿಗಳಿಗೆ ಜೇಮ್ಸ್ ದರ್ಶನ ಸಿಗಲಿದೆ. ಈ ವಿಚಾರ ಸದ್ಯ ಇಡೀ ಅಪ್ಪು ಅಭಿಮಾನಿಗಳಲ್ಲಿ ಸಂತಸ ಮೂಡಿಸಿದೆ.
ಚಂದನ.ಎಸ್, ಫಿಲ್ಮ್ ಬ್ಯೂರೋ, ಪವರ್ ಟಿವಿ