ಟೀಮ್ ಇಂಡಿಯಾ ಮಾಜಿ ಕ್ಯಾಪ್ಟನ್ ಸೌರವ್ ಗಂಗೂಲಿ ಬಿಸಿಸಿಐ ನೂತನ ಅಧ್ಯಕ್ಷರಾಗಿ ನಿನ್ನೆಯಷ್ಟೇ ಅಧಿಕಾರದ ಚುಕ್ಕಾಣಿ ಹಿಡಿದಿದ್ದಾರೆ. ಬಂಗಾಳದ ಹುಲಿ ಬಿಸಿಸಿಐ ಅಧ್ಯಕ್ಷರಾಗಿದ್ದು ಭಾರತೀಯ ಕ್ರಿಕೆಟಿನ ಬದಲಾವಣೆಯ ಪರ್ವಕಾಲ ಎಂದೇ ವಿಶ್ಲೇಷಿಸಲಾಗುತ್ತಿದೆ. ಆದರೆ, ಬಿಸಿಸಿಐನ 39ನೇ ಅಧ್ಯಕ್ಷರಾಗಿ ಅಧಿಕಾರವಹಿಸಿಕೊಂಡಿರುವ ಗಂಗೂಲಿ ಅಧಿಕಾರ ಅವಧಿ ಕೇವಲ 9 ತಿಂಗಳು ಮಾತ್ರ! ಅಷ್ಟಕ್ಕೂ ‘ದಾದಾ’ಗಿರಿ 9 ತಿಂಗಳಲ್ಲಿ ಮುಕ್ತಾಯವಾಗುವುದು ಏಕೆ ಅಂತೀರಾ? ಅದಕ್ಕೆ ಅಸಲಿ ಕಾರಣ ಇಲ್ಲಿದೆ.
ಲೋಧಾ ಸಮಿತಿ ಶಿಫಾರಸ್ಸಿನಂತೆ ಬಿಸಿಸಿಐ ಕೂಲಿಂಗ್ ಆಫ್ ನಿಯಮ ಜಾರಿಗೆ ತಂದಿದೆ. ಈ ನಿಯಮದ ಅನ್ವಯ ಬಿಸಿಸಿಐ ಅಥವಾ ಅದರ ಅಧೀನ ಸಂಸ್ಥೆಗಳಲ್ಲಿ ಒಟ್ಟಾರೆಯಾಗಿ 6 ವರ್ಷಗಳವರೆಗೆ ಮಾತ್ರ ಅಧಿಕಾರದಲ್ಲಿರಬಹುದು. ಬಳಿಕ ಅಧಿಕಾರದಿಂದ ಕೆಳಗಿಳಿದು ಮುಂದಿನ 3 ವರ್ಷ ಯಾವುದೇ ಅಧಿಕಾರ ಹೊಂದುವಂತಿಲ್ಲ. ಸೌರವ್ ಗಂಗೂಲಿ ಬಿಸಿಸಿಐ ಅಡಿಯಲ್ಲಿರುವ ಬಂಗಾಳ ಕ್ರಿಕೆಟ್ ಅಸೋಷಿಯೇಷನ್ ಅಧ್ಯಕ್ಷರಾಗಿ 5.2 ವರ್ಷ ಪೂರೈಸಿರುವುದರಿಂದ 9 ತಿಂಗಳು ಮಾತ್ರ ಬಿಸಿಸಿಐ ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸಬಹುದು. ಹೀಗಾಗಿ 2020ರ ಜುಲೈನಲ್ಲಿ ಗಂಗೂಲಿ ‘ದಾದಾ’ಗಿರಿ ಅಂತ್ಯವಾಗಲಿದೆ.
ಬಿಸಿಸಿಐನಲ್ಲಿ ‘ದಾದಾ’ ಗಿರಿ 9 ತಿಂಗಳು ಮಾತ್ರ! ಇಲ್ಲಿದೆ ಅಸಲಿ ಕಾರಣ
