ವಿಶ್ವದ ಮಾಜಿ ನಂ.1 ಟೆನ್ನಿಸ್ ಪಟು ಆ್ಯಂಡಿ ಮರ್ರೆ ವೃತ್ತಿ ಜೀವನಕ್ಕೆ ಫುಲ್ಸ್ಟಾಪ್ ಇಡುವ ಸೂಚನೆ ನೀಡಿದ್ದಾರೆ. ಮುಂದಿನ ವಾರ ಆರಂಭವಾಗಲಿರುವ ಆಸ್ಟ್ರೇಲಿಯಾ ಓಪನ್ ತಮ್ಮ ವೃತ್ತಿ ಬದಕನ್ನು ಕೊನೆಯ ಟೂರ್ನಿಯಾಗಲಿದೆ ಎಂದು ಮರ್ರೆ ತಿಳಿಸಿದ್ದಾರೆ. ಆದರೆ ಈ ವರ್ಷ ವಿಂಬಲ್ಡನ್ನಲ್ಲಿ ಆಡಬೇಕೆಂಬ ಬಯಕೆಯೂ ಇದೆ ಅಂತ ಈ ಸಂದರ್ಭದಲ್ಲಿ ವ್ಯಕ್ತ ಪಡಿಸಿದ್ದಾರೆ.
ಈವರೆಗೂ 3 ಬಾರಿ ಗ್ರ್ಯಾಂಡ್ ಸ್ಲಾಮ್ ಜಯಸಿರುವ ಮರ್ರೆ ತೀವ್ರ ಸೊಂಟ ನೋವಿನಿಂದ ಬಳಲುತ್ತಿರುವುದಾಗಿ ತಿಳಿಸಿದ್ದಾರೆ. ಹೀಗಾಗಿ ಅಭ್ಯಾಸ ನಡೆಸಲು ಸಹ ಆಗುತ್ತಿಲ್ಲ, ನಾನು ಸೀಮಿತ ಚಲನವಲನಗಳೊಂದಿಗೆ ಮಾತ್ರ ಆಡಲು ಸಾಧ್ಯ. ಸ್ಪರ್ಧೆ ಅಥವಾ ಕಠಿಣ ಅಭ್ಯಾಸ ಮಾಡಲು ನನಗೆ ಕೆಲ ಇತಿಮಿತಿಗಳಿವೆ ಎಂದು ಮರ್ರೆ ಹೇಳಿದರು.
ಗಾಯದ ಸಮಸ್ಯೆಯಿಂದ ಕಳೆದ ವರ್ಷದ ಆಸ್ಟ್ರೇಲಿಯನ್ ಓಪನ್ನಿಂದಲೂ ದೂರ ಉಳಿದಿದ್ದ ಮರ್ರೆ, ಬಳಿಕ ಸೊಂಟದ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು.
ಸದ್ಯ ರ‍್ಯಾಂಕಿಂಗ್‌ ಪಟ್ಟಿಯಲ್ಲಿ 230 ಸ್ಥಾನದಲ್ಲಿರುವ ಮರ್ರೆ ವೃತ್ತಿ ಜೀವನದಲ್ಲಿ 3 ಗ್ರ್ಯಾಂಡ್ ಸ್ಲ್ಯಾಂ ಜಯಿಸಿದ್ದಾರೆ. 2005ರಲ್ಲಿ ವೃತ್ತಿ ಬದುಕು ಆರಂಭಿಸಿದ ಮರ್ರೆ 2 ಬಾರಿ ಒಲಿಂಪಿಕ್‌ ಚಿನ್ನದ ಪದಕ, 45 ಎಟಿಪಿ ಪ್ರಶಸ್ತಿ, 2 ವಿಂಬಲ್ಡನ್, 1 ಯುಎಸ್ ಓಪನ್ ಪ್ರಶಸ್ತಿಗಳನ್ನು ಜಯಿಸಿದ್ದಾರೆ.
