ಪಾರಿವಾಳ ರಕ್ಷಿಸಿ ಮಾನವೀಯತೆ ಮೆರೆದ ಯುವಕ

ಶಿವಮೊಗ್ಗ :  ಕಂಬವೊಂದಕ್ಕೆ ಕಟ್ಟಿದ್ದ ದಾರಕ್ಕೆ ಸಿಲುಕಿ ನರಳಾಡುತ್ತಿದ್ದ ಪಾರಿವಾಳವೊಂದನ್ನು ರಕ್ಷಿಸಿ ಯುವಕನೊಬ್ಬ ಮಾನವೀಯತೆ ಮೆರೆದಿದ್ದಾನೆ.

ಶಿವಮೊಗ್ಗ ಜಿಲ್ಲೆಯ ಭದ್ರಾವತಿಯ ಬಸವೇಶ್ವರ ಸರ್ಕಲ್ ​ನಲ್ಲಿರುವ ವಿದ್ಯುತ್ ಕಂಬಕ್ಕೆ ಕಟ್ಟಿದ್ದ ದಾರಕ್ಕೆ ಸಿಲುಕಿದ ಪಾರಿವಾಳವೊಂದು ಅತ್ತ ಹಾರಲು ಆಗದೇ, ನಿಲ್ಲಲೂ ಆಗದೇ.  ಹಲವಾರು ತಾಸುಗಳಿಂದ ಒದ್ದಾಡುತ್ತಿತ್ತು.  ಅನೇಕರು ಇದನ್ನು ಕಂಡೂ ಕಾಣದವರಂತೆ ತೆರಳುತ್ತಿದ್ದರು, ಈ ವೇಳೆಗೆ ಆಗಮಿಸಿದ ಯುವಕನೊಬ್ಬ ಕೂಡಲೇ ಲೈಟ್​ ಕಂಬವನ್ನೇರಿ ಪಾರಿವಾಳವನ್ನು ಹಗ್ಗದಿಂದ ಬಿಡುಗಡೆಗೊಳಿಸಿ ಮಾನವೀಯತೆ ಮೆರೆದಿದ್ದಾನೆ. ಯುವಕನ ಈ ಸಾಹಸ ಸ್ಥಳೀಯರ ಮೊಬೈಲ್​ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ ಮತ್ತು ಯುವಕನ ಕಾರ್ಯಕ್ಕೆ  ವ್ಯಾಪಕ ಶ್ಲಾಘನೆ ವ್ಯಕ್ತವಾಗಿದೆ.