Saturday, May 21, 2022
Powertv Logo
Home Blog

ಶಿವಲಿಂಗ ರಕ್ಷಣೆ & ನಮಾಜ್‌ಗೆ ಮಧ್ಯಂತರ ಆದೇಶ ಮುಂದುವರಿಕೆ

ನವದೆಹಲಿ: ಭಾರಿ ಕುತೂಹಲ ಕೆರಳಿಸಿದ್ದ ಜ್ಞಾನವಾಪಿ ಮಸೀದಿ ಪ್ರಕರಣದ ವಿಚಾರಣೆಯನ್ನು ಸುಪ್ರೀಂಕೋರ್ಟ್‌ ಕೈಗೆತ್ತಿಕೊಂಡಿತ್ತು. ಜ್ಞಾನವಾಪಿ ಮಸೀದಿ ಸಂಕೀರ್ಣದ ವಿಡಿಯೋಗ್ರಾಫಿಕ್ ಸಮೀಕ್ಷೆಗೆ ನಿರ್ದೇಶಿಸಿದ ವಾರಣಸಿ ಜಿಲ್ಲಾ ನ್ಯಾಯಾಲಯದ ಆದೇಶದ ವಿರುದ್ಧ ಅಂಜುಮನ್ ಇಂತೇಜಾಮಿಯಾ ಮಸಜೀದ್ ಸಮಿತಿಯ ಮನವಿಯನ್ನು ಸುಪ್ರೀಂಕೋರ್ಟ್ ವಿಚಾರಣೆ ನಡೆಸಿತು. ಜ್ಞಾನವಾಪಿ ಮಸೀದಿಗೆ ಸಂಬಂಧಿಸಿದಂತೆ ಆಯೋಗದ ವರದಿಯು ಸೋರಿಕೆಯಾಗಲು ಸಾಧ್ಯವಿಲ್ಲ ಯಾವುದೇ ಕಾರಣಕ್ಕೂ ಪತ್ರಿಕೆಗಳಿಗೆ ವಿಷಯವನ್ನು ಸೋರಿಕೆ ಮಾಡಬೇಡಿ, ನ್ಯಾಯಾಧೀಶರು ಮಾತ್ರ ವರದಿಯನ್ನು ತೆರೆಯುತ್ತಾರೆ ಎಂದು ಹೇಳಿತು.

ಜ್ಞಾನವಾಪಿ ಮಸೀದಿ ಪ್ರಕರಣ ಸಂಬಂಧ ಅಂಜುಮನ್ ಇಂತೇಜಾಮಿಯಾ ಮಸಜಿದ್ ಸಮಿತಿಯ ಮನವಿಯನ್ನು ಜಿಲ್ಲಾ ನ್ಯಾಯಾಧೀಶರು ಮೊಕದ್ದಮೆಯ ವರ್ಗಾವಣೆಗೆ ಆದ್ಯತೆ ಮೇಲೆ ನಿರ್ಧರಿಸುತ್ತಾರೆ ಎಂದು ಸುಪ್ರೀಂಕೋರ್ಟ್ ಹೇಳಿದೆ. ಶಿವಲಿಂಗ ಪ್ರದೇಶದ ರಕ್ಷಣೆ ಮತ್ತು ನಮಾಜ್ ಮಾಡಲು ಮುಸ್ಲಿಮರಿಗೆ ಉಚಿತ ಪ್ರವೇಶಕ್ಕಾಗಿ ಮೇ 17ರ ಮಧ್ಯಂತರ ಆದೇಶ ಮುಂದುವರಿಯುತ್ತದೆ ಎಂದು ಸುಪ್ರೀಂಕೋರ್ಟ್ ತಿಳಿಸಿದೆ.

ಸುಪ್ರೀಂಕೋರ್ಟ್ ನಲ್ಲಿ ವಕೀಲರು ಮಂಡಿಸಿದ ವಾದ ನಮ್ಮ ಪ್ರಕಾರ ಶಿವಲಿಂಗವಲ್ಲ ಕಾರಂಜಿ, ವಾಜು ಖಾನಾವನ್ನು ಸೀಲ್ ಮಾಡಲಾಗಿದೆ. ಕಬ್ಬಿಣದ ಗೇಟ್‌ಗಳನ್ನು ಬಿಗಿ ಪೊಲೀಸ್ ಉಪಸ್ಥಿತಿಯಲ್ಲಿ ಇರಿಸಲಾಗಿದೆ ಎಂದು ಮಸಜಿದ್ ಕಮಿಟಿ ಪರ ಹಿರಿಯ ವಕೀಲ ಹುಝೆಫಾ ಅಹ್ಮದಿಯವರು ಸುಪ್ರೀಂ ಕೋರ್ಟ್​ಗೆ ತಿಳಿಸಿದರು.

400 ವರ್ಷಗಳ ಹಿಂದೆ ದೇವಾಲಯ ಕೆಡವಿರುವ ಬಗ್ಗೆ ಉಲ್ಲೇಖ ಉತ್ತರ ಪ್ರದೇಶದ  ಜ್ಞಾನವಾಪಿ ಸಂಕೀರ್ಣದಲ್ಲಿರುವ ಮಸೀದಿಗೆ ಸಂಬಂಧಿಸಿದಂತೆ ಮೊದಲಿನಿಂದಲೂ ವಿವಾದವಿದೆ. 400 ವರ್ಷಗಳ ಹಿಂದೆ ದೇವಾಲಯವನ್ನು ಕೆಡವಿ ಅಲ್ಲಿ ಮಸೀದಿಯನ್ನು ನಿರ್ಮಿಸಲಾಯಿತು, ಅಲ್ಲಿ ಮುಸ್ಲಿಂ ಸಮುದಾಯದವರು ನಮಾಜ್ ಮಾಡುತ್ತಾರೆ ಎಂದು ಹಿಂದುಗಳು ಆರೋಪ ಮಾಡ್ತಿದ್ದಾರೆ.

ಜ್ಞಾನವಾಪಿ ಮಸೀದಿಯನ್ನು ಅಂಜುಮನ್-ಎ-ಇಂತಜಾಮಿಯಾ ಸಮಿತಿಯು ನಡೆಸುತ್ತಿದೆ. ಈ ಬಗ್ಗೆ 1991ರಲ್ಲಿ ವಾರಣಾಸಿಯ ಸಿವಿಲ್ ನ್ಯಾಯಾಧೀಶರ ನ್ಯಾಯಾಲಯದಲ್ಲಿ ಅರ್ಜಿ ಸಲ್ಲಿಸಲಾಗಿತ್ತು. ಜ್ಞಾನವಾಪಿ ಮಸೀದಿ ಇರುವ ಸ್ಥಳದಲ್ಲಿ ಹಿಂದೆ ವಿಶ್ವನಾಥ ದೇವರ ದೇಗುಲವಿದ್ದು, ಶೃಂಗಾರ್ ಗೌರಿಯನ್ನು ಪೂಜಿಸಲಾಗುತ್ತಿತ್ತು ಎನ್ನಲಾಗಿದೆ. ಜ್ಞಾನವಾಪಿ ಸಂಕೀರ್ಣವನ್ನು ಮುಸ್ಲಿಂ ಕಡೆಯಿಂದ ತೆರವು ಮಾಡಿ ಹಿಂದೂಗಳ ಸುಪರ್ದಿಗೆ ನೀಡಬೇಕು ಎಂದು ಮನವಿಯಲ್ಲಿ ಆಗ್ರಹಿಸಲಾಗಿದೆ. ವಾರಣಾಸಿಯ ಜ್ಞಾನವಾಪಿ ಕಾಂಪ್ಲೆಕ್ಸ್‌ನಲ್ಲಿರುವ ಬಾಬಾ ವಿಶ್ವನಾಥನ ದೇವಸ್ಥಾನ ಮತ್ತು ಮಸೀದಿಗೆ ಸಂಬಂಧಿಸಿದ ವಿವಾದ ಇದಾಗಿದ್ದು, ಸದ್ಯ ಪ್ರಕರಣ ವಿಚಾರ ಮತ್ತೆ ಉತ್ತರ ಪ್ರದೇಶದ ಜಿಲ್ಲಾ ನ್ಯಾಯಾಲಯಕ್ಕೆ ವರ್ಗಾವಣೆಗೆಯಾಗಿದೆ.

ಇಂದ್ರಾಣಿ ಮುಖರ್ಜಿಗೆ ಮುಂಬೈ ಜೈಲಿನಿಂದ ಬಿಡುಗಡೆ

ಮಾಧ್ಯಮ ಸಮೂಹಗಳ ಮಾಜಿ ಒಡತಿ ಇಂದ್ರಾಣಿ ಮುಖರ್ಜಿಗೆ ಜೈಲಿನಿಂದ ಬಿಡುಗಡೆ ಭಾಗ್ಯ ಸಿಕ್ಕಿದೆ. ಬುಧವಾರವೇ ಸುಪ್ರೀಂ ಕೋರ್ಟ್‌ ಇಂದ್ರಾಣಿ ಮುಖರ್ಜಿಗೆ ಜಾಮೀನು ನೀಡಿತ್ತು. ಜಾಮೀನು ಸಿಕ್ಕ ಬಳಿಕ ಮುಂಬೈ ಜೈಲಿನಿಂದ ಇಂದ್ರಾಣಿ ಮುಖರ್ಜಿ ಅವರಿಗೆ ಬಿಡುಗಡೆ ಸಿಕ್ಕಿದೆ.

2012ರಲ್ಲಿ ತನ್ನ ಮಗಳನ್ನೇ ಹತ್ಯೆಗೈದ ಆರೋಪ ಇಂದ್ರಾಣಿ ಮುಖರ್ಜಿ ಮೇಲಿದೆ. ಬುಧವಾರವೇ ಇಂದ್ರಾಣಿ ಮುಖರ್ಜಿ ಅವರಿಗೆ ಜಾಮೀನು ಸಿಕ್ಕಿತ್ತಾದರೂ, ಕಾಗದ ಪತ್ರ ವ್ಯವಹಾರ ಪೂರ್ಣವಾಗದ ಕಾರಣ, ಇಂದು ಜೈಲಿನಿಂದ ಬಿಡುಗಡೆಗೊಂಡರು. ಇದೀಗ ಜಾಮೀನು ಲಭ್ಯವಾಗುವ ಮೂಲಕ ಇಂದ್ರಾಣಿ ಮುಖರ್ಜಿ ಅವರ ಆರೂವರೆ ವರ್ಷಗಳ ಕಾರಾಗೃಹ ವಾಸಕ್ಕೆ ಬ್ರೇಕ್ ಬಿದ್ದಿದೆ. 2015ರಲ್ಲಿ ಇಂದ್ರಾಣಿ ಮುಖರ್ಜಿ ಅವರನ್ನು ಬಂಧಿಸಿ ಮುಂಬೈ ಜೈಲಿನಲ್ಲಿ ಇರಿಸಲಾಗಿತ್ತು. ವಿಶೇಷ ಸಿಬಿಐ ನ್ಯಾಯಾಲಯವು ಇಂದ್ರಾಣಿ ಮುಖರ್ಜಿ ಅವರಿಗೆ ಹಲವು ಬಾರಿ ಜಾಮೀನು ನಿರಾಕರಿಸಿತ್ತು. ಕಳೆದ ಫೆಬ್ರುವರಿಯಲ್ಲಷ್ಟೇ ಇಂದ್ರಾಣಿ ಮುಖರ್ಜಿ ಪರ ವಕೀಲರು ಸುಪ್ರೀಂ ಕೋರ್ಟ್‌ ಕದ ತಟ್ಟಿದ್ದರು.

ಇಂದ್ರಾಣಿ ಮುಖರ್ಜಿ ಅವರು ಈಗಾಗಲೇ ಹಲವು ವರ್ಷಗಳ ಕಾಲ ಸುದೀರ್ಘ ಜೈಲು ವಾಸ ಅನುಭವಿಸಿರುವ ಹಿನ್ನೆಲೆಯಲ್ಲಿ ಜಾಮೀನು ನೀಡುತ್ತಿರೋದಾಗಿ ಸುಪ್ರೀಂ ಕೋರ್ಟ್‌ ಹೇಳಿದೆ. ಇದೇ ವೇಳೆ ದೇಶ ಬಿಟ್ಟು ಹೋಗಬಾರದು ಹಾಗೂ ಯಾವುದೇ ಕಾರಣಕ್ಕೂ ಪ್ರಕರಣದ ಸಾಕ್ಷ್ಯಗಳನ್ನು ಸಂಪರ್ಕ ಮಾಡಬಾರದು ಎಂದು ಸುಪ್ರೀಂ ಕೋರ್ಟ್‌ ಇಂದ್ರಾಣಿ ಮುಖರ್ಜಿ ಅವರಿಗೆ ಷರತ್ತು ವಿಧಿಸಿ ಜಾಮೀನು ನೀಡಿದೆ.

ಹೈದರಾಬಾದ್‌ ರೇಪಿಸ್ಟ್‌ಗಳ ಎನ್‌ಕೌಂಟರ್ ನಕಲಿ

ಹೈದರಾಬಾದ್ ಎನ್‌ಕೌಂಟರ್ ಪ್ರಕರಣದ ತನಿಖೆ ನಡೆಸುತ್ತಿರುವ ನ್ಯಾಯಾಂಗ ಆಯೋಗವು ನಾಲ್ವರು ಆರೋಪಿಗಳ ಪೊಲೀಸ್ ಎನ್‌ಕೌಂಟರ್ ಅನ್ನು ನಕಲಿ ಎಂದು ಹೇಳಿದೆ. ಇದರೊಂದಿಗೆ 10 ಪೊಲೀಸರನ್ನು ಕೊಲೆ ಪ್ರಕರಣದ ವಿಚಾರಣೆಗೆ ಒಳಪಡಿಸಲು ಆಯೋಗ ಶಿಫಾರಸು ಮಾಡಿದೆ. ಸುಪ್ರೀಂ ಕೋರ್ಟ್ ನೇಮಿಸಿದ ನ್ಯಾಯಮೂರ್ತಿ ಸಿರ್ಪುರ್ಕರ್ ಆಯೋಗದ ವರದಿಯಲ್ಲಿ ಈ ಶಿಫಾರಸು ಮಾಡಲಾಗಿದೆ. ಆರೋಪಿಗಳು ಪಿಸ್ತೂಲ್ ಕಸಿದು ಪರಾರಿಯಾಗಲು ಯತ್ನಿಸಿದ್ದಾರೆ ಎಂಬ ಪೊಲೀಸರ ಹೇಳಿಕೆಯನ್ನು ನಂಬಲು ಸಾಧ್ಯವಿಲ್ಲ. ಈ ವಾದಗಳು ಸಾಕ್ಷ್ಯಾಧಾರಗಳನ್ನು ಆಧರಿಸಿಲ್ಲ ಎಂದು ಆಯೋಗ ಹೇಳಿದೆ.

ನ್ಯಾಯಮೂರ್ತಿ ವಿಎಸ್ ಸಿರ್ಪುರ್ಕರ್ ಆಯೋಗವು ತನ್ನ ವರದಿಯಲ್ಲಿ ಎನ್‌ಕೌಂಟರ್ ಕುರಿತು ಹಲವು ಪ್ರಶ್ನೆಗಳನ್ನು ಎತ್ತಿದೆ. ಎನ್‌ಕೌಂಟರ್‌ನಲ್ಲಿ ಹತರಾದ ನಾಲ್ವರು ಆರೋಪಿಗಳ ಪೈಕಿ ಮೂವರು ಅಪ್ರಾಪ್ತರು ಎಂದು ಆಯೋಗ ತನ್ನ ವರದಿಯಲ್ಲಿ ತಿಳಿಸಿದೆ. ಶೇಕ್ ಲಾಲ್ ಮಾಧರ್, ಮೊಹಮ್ಮದ್ ಸಿರಾಜುದ್ದೀನ್, ಕೊಚೆರ್ಲಾ ರವಿ ಸೇರಿದಂತೆ ಹತ್ತು ಮಂದಿ ಪೊಲೀಸರನ್ನು ಕೊಲೆ ಅಂದರೆ 302ರ ಅಡಿಯಲ್ಲಿ ವಿಚಾರಣೆಗೊಳಪಡಿಸಬೇಕು ಎಂದು ಆರೋಪಿಗಳನ್ನು ಉದ್ದೇಶಪೂರ್ವಕವಾಗಿ ವಜಾ ಮಾಡಲಾಗಿದೆ ಎಂದು ಆಯೋಗ ವರದಿಯಲ್ಲಿ ಬರೆದಿದೆ.

ಹೈದರಾಬಾದ್ ಎನ್‌ಕೌಂಟರ್ ಪ್ರಕರಣದ ನ್ಯಾಯಾಂಗ ತನಿಖೆಯ ವರದಿಯು ಸಾರ್ವಜನಿಕವಾಗಿರುತ್ತದೆ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟವಾಗಿ ಹೇಳಿತ್ತು. ವರದಿಯನ್ನು ಮೊಹರು ಮಾಡಬೇಕೆಂಬ ತೆಲಂಗಾಣ ಸರ್ಕಾರದ ಬೇಡಿಕೆಯನ್ನು ತಿರಸ್ಕರಿಸಿದ ನ್ಯಾಯಾಲಯವು ವಿಷಯವನ್ನು ತೆಲಂಗಾಣ ಹೈಕೋರ್ಟ್‌ಗೆ ಹಿಂತಿರುಗಿಸಿತು. ತನಿಖಾ ವರದಿಯ ಪ್ರತಿಯನ್ನು ಅರ್ಜಿದಾರರೊಂದಿಗೆ ಹಂಚಿಕೊಳ್ಳಬೇಕು ಎಂದು ಸಿಜೆಐ ಎನ್‌ವಿ ರಮಣ ಹೇಳಿದ್ದಾರೆ. ಗೌಪ್ಯವಾಗಿಡಲು ಏನೂ ಇಲ್ಲ. ಆಯೋಗವು ತಪ್ಪಿತಸ್ಥರನ್ನು ಕಂಡುಹಿಡಿದಿದೆ. ಈಗ ರಾಜ್ಯವು ಕಾರ್ಯನಿರ್ವಹಿಸಬೇಕಾಗಿದೆ.

ನಾವು ವಿಷಯವನ್ನು ಹೈಕೋರ್ಟ್‌ಗೆ ಕಳುಹಿಸುತ್ತೇವೆ. ಎಲ್ಲಾ ದಾಖಲೆಗಳನ್ನು ಹೈಕೋರ್ಟ್‌ಗೆ ಕಳುಹಿಸಬೇಕು ಮತ್ತು ಹೈಕೋರ್ಟ್ ವರದಿಯನ್ನು ಪರಿಶೀಲಿಸಬೇಕು. ಇದೊಂದು ಸಾರ್ವಜನಿಕ ವಿಚಾರಣೆ. ವರದಿಯ ವಿಷಯಗಳನ್ನು ಬಹಿರಂಗಪಡಿಸಬೇಕು. ವರದಿ ಬಂದ ನಂತರ ಅದನ್ನು ಬಹಿರಂಗಪಡಿಸಬೇಕು ಎಂದು ತೆಲಂಗಾಣ ಸರ್ಕಾರದ ಪರ ವಕೀಲರು ಹೇಳಿದಾಗ, ಈ ಹಿಂದೆ ನ್ಯಾಯಾಲಯವು ವರದಿಗಳನ್ನು ಸೀಲಿಂಗ್ ಮಾಡಲು ಅವಕಾಶ ನೀಡಿದ್ದು, ಈ ವರದಿಗಳು ಹೊರಬಂದರೆ ನ್ಯಾಯಾಂಗ ಆಡಳಿತಕ್ಕೆ ತೊಂದರೆಯಾಗುತ್ತದೆ ಎಂದು ಸಿಜೆಐ ಹೇಳಿದರು. ರಾಷ್ಟ್ರೀಯ ಭದ್ರತೆ ಪ್ರಕರಣಗಳಲ್ಲಿ, ನ್ಯಾಯಾಲಯವು ಹಾಗೆ ಮಾಡಿದೆ. ಇದೊಂದು ಎನ್‌ಕೌಂಟರ್ ಪ್ರಕರಣ. ವರದಿಯನ್ನು ಬಹಿರಂಗಪಡಿಸದಿದ್ದರೆ ನ್ಯಾಯಾಂಗ ತನಿಖೆಯ ಅಗತ್ಯವೇನು? ಎಂದು ಪ್ರಶ್ನಿಸಿದ್ದಾರೆ.

ಭಾಷಾ ವಿವಾದ ಹುಟ್ಟು ಹಾಕೋರಿಗೆ ಮೋದಿ ಹೇಳಿದ್ದೇನು ?

ಹಿಂದಿ ರಾಷ್ಟ್ರೀಯ ಭಾಷೆ ಅನ್ನೋ ಬಗ್ಗೆ ಸಿಕ್ಕಾಪಟ್ಟೆ ತರ್ಕಗಳು ನಡಿತಿವೆ. ಜೊತೆಗೆ, ಕಾಲು ಕೆರೆದು ಜಗಳಕ್ಕೆ ನಿಂತಿರುವ ಉತ್ತರದ ಮಂದಿಗೆ ಸ್ಯಾಂಡಲ್‌ವುಡ್‌ ಸೇರಿ ದಕ್ಷಿಣ ಭಾರತದ ಹಲವು ಸ್ಟಾರ್‌ಗಳು ಕಿಡಿಕಾರಿದ್ರು. ಆದ್ರೆ, ಹೀಗೆ ಭಾಷೆಗಳ ಮಧ್ಯೆ ಬೆಂಕಿ ಹಚ್ಚೋರಿಗೆ ಮೋದಿ ಮಾತು ಬೆಂಕಿಯುಂಡೆಯಾದ್ರೂ ಆಶ್ಚರ್ಯವಿಲ್ಲ.

ಹೌದು, ಹಿಂದಿ ಭಾರತದ ರಾಷ್ಟ್ರ ಭಾಷೆ ಅಲ್ಲ ಎಂಬ ಕನ್ನಡದ ನಟ ಕಿಚ್ಚ ಸುದೀಪ್ ಹೇಳಿಕೆಗೆ ಬಾಲಿವುಡ್ ನಟ ಅಜಯ್ ದೇವಗನ್ ಟ್ವಿಟ್ಟರ್ನಲ್ಲಿ ಪ್ರತಿಕ್ರಿಯಿಸಿದ್ದು, ಇತ್ತೀಚೆಗೆ ಭಾಷೆಗಳ ಚರ್ಚೆಯನ್ನು ಹುಟ್ಟು ಹಾಕಿತ್ತು. ಇದೀಗ ಖುದ್ದು ಪ್ರಧಾನಿ ನರೇಂದ್ರ ಮೋದಿ ಅವರು ಪ್ರಾದೇಶಿಕ ಭಾಷೆಗಳ ಬಗ್ಗೆ ಮಾತನಾಡಿದ್ದಾರೆ.

ಭಾಷೆಗಳ ಆಧಾರದ ಮೇಲೆ ವಿವಾದಗಳನ್ನು ಹುಟ್ಟುಹಾಕಲು ಪ್ರಯತ್ನಿಸುತ್ತಿದ್ದಾರೆ. ಬಿಜೆಪಿಯು ಪ್ರತಿಯೊಂದು ಪ್ರಾದೇಶಿಕ ಭಾಷೆಯಲ್ಲಿ ಭಾರತೀಯ ಸಂಸ್ಕೃತಿಯ ಪ್ರತಿಬಿಂಬವನ್ನು ನೋಡುತ್ತದೆ. ಅವುಗಳನ್ನು ಪೂಜಿಸಲು ಯೋಗ್ಯವೆಂದು ಪರಿಗಣಿಸುತ್ತದೆ. NEP ಯಲ್ಲಿ ನಾವು ಪ್ರತಿಯೊಂದು ಪ್ರಾದೇಶಿಕ ಭಾಷೆಗೆ ಪ್ರಾಮುಖ್ಯತೆ ನೀಡಿದ್ದೇವೆ ಎಂದು ಹೇಳಿದ್ರು.

ಬಿಜೆಪಿಯು ಭಾರತೀಯ ಭಾಷೆಗಳನ್ನು ಭಾರತದ ಆತ್ಮ ಮತ್ತು ರಾಷ್ಟ್ರದ ಉತ್ತಮ ಭವಿಷ್ಯಕ್ಕೆ ಕೊಂಡಿ ಎಂದು ಪರಿಗಣಿಸುತ್ತದೆ ಎಂದು ಜೈಪುರದಲ್ಲಿ ಬಿಜೆಪಿ ರಾಷ್ಟ್ರೀಯ ಪದಾಧಿಕಾರಿಗಳ ಸಭೆಯನ್ನು ಉದ್ದೇಶಿಸಿ ಪ್ರಧಾನಿ ಮೋದಿ ಹೇಳಿದರು.

ಈ ವರ್ಷದ ಕೊನೆಯಲ್ಲಿ ಗುಜರಾತ್ ಮತ್ತು ಹಿಮಾಚಲ ಪ್ರದೇಶದಲ್ಲಿ ವಿಧಾನಸಭಾ ಚುನಾವಣೆಗಳು ನಡೆಯಲಿದ್ದು, ಛತ್ತೀಸ್ಗಢ, ರಾಜಸ್ಥಾನ, ತೆಲಂಗಾಣ, ತ್ರಿಪುರಾ, ಮಧ್ಯಪ್ರದೇಶ, ಕರ್ನಾಟಕ, ಮೇಘಾಲಯ, ಮಿಜೋರಾಂ ಮತ್ತು ನಾಗಾಲ್ಯಾಂಡ್ ನಲ್ಲಿ ಮುಂದಿನ ವರ್ಷ ಚುನಾವಣೆ ನಡೆಯಲಿದೆ. ಈ ಮಧ್ಯೆ, ಭಾಷಾ ಯುದ್ಧ ಜೋರಾಗಿದ್ದು, ಇದು ಚುನಾವಣೆ ಮೇಲೆ ಪರಿಣಾಮ ಬೀರಲಿದೆ ಅನ್ನೋದನ್ನು ಮೋದಿ ಮನಗಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಭಾಷಾ ಯುದ್ಧದ ವಿಚಾರದಲ್ಲಿ ಮೌನ ಮುರಿದಿದ್ದು, ವಿಷ ಬೀಜ ಬಿತ್ತುವವರಿಗೆ ಎಚ್ಚರಿಕೆ ನೀಡಿದ್ದಾರೆ.

ಕೋಟಿ ಕೋಟಿ ನುಂಗಿ ಆಯಕಟ್ಟಿನಲ್ಲೇ ಇರೋ ತಿಮಿಂಗಿಲಗಳು..!

ಬೆಂಗಳೂರು: ಸಿಲಿಕಾನ್​ ಸಿಟಿ ಅಭಿವೃದ್ಧಿ ಪ್ರಾಧಿಕಾರಕ್ಕೆ ಮಕ್ಮಲ್ ಟೋಪಿ ಹಾಕಿದ್ದ ಏಜೆಂಟ್ ಇಂದ್ರ ಕುಮಾರ್ ಕೇಸ್ ಸಿಕ್ಕಾಪಟ್ಟೆ ಸೌಂಡ್ ಮಾಡಿತ್ತು. ಆದ್ರೆ, ಬರ್ತಾ ಬರ್ತಾ ಆ ಕೇಸ್ ಬಗ್ಗೆ ಅಧಿಕಾರಿಗಳು ತಲೆನೇ ಕೆಡಿಸಿಕೊಳ್ತಿಲ್ಲ. ಪ್ರಾಧಿಕಾರಕ್ಕೆ ನೂರಾರು ಕೋಟಿ ನಷ್ಟ ಉಂಟು ಮಾಡಿದ್ರೂ ಅವ್ರ ಬಗ್ಗೆ ಅದೇನ್ ವ್ಯಾಮೋಹವೋ ಗೊತ್ತಿಲ್ಲ. ಕೇಸ್‌ಗೂ ತಮಗೂ ಸಂಬಂಧವೇ ಇಲ್ಲದಂತೆ ಬಿಡಿಎ ಅಧಿಕಾರಿಗಳು ಹಾಗೂ ವಕೀಲರು ಇದ್ದಾರೆ. ಪ್ರಾಧಿಕಾರದ 60 ಕ್ಕೂ ಹೆಚ್ಚು ನಿವೇಶನಗಳನ್ನ ಕಾಲ್ಪನಿಕ ವ್ಯಕ್ತಿಗಳ ಹೆಸರಿನಲ್ಲಿ ದಾಖಲೆ ಸೃಷ್ಟಿಸಿ ಬೃಹತ್ ಗೋಲ್‌ಮಾಲ್ ಮಾಡಿದ್ರು.. ಪ್ರಕರದಲ್ಲಿ ಏಜೆಂಟ್ ಇಂದ್ರ ಕುಮಾರ್ ಪ್ರಮುಖ ಆರೋಪಿ. ಆದ್ರೆ, ಪ್ರಕರಣ ದಾಖಲಾಗಿ ಎರಡೂವರೆ ವರ್ಷ ಕಳೆಯುತ್ತಿದ್ರೂ, ಯಾರೊಬ್ಬರ ಮೇಲೂ ಕ್ರಮ ಆಗಿಲ್ಲ.

ಇನ್ನು ಈ ಸಂಬಂಧ ಬಿಡಿಎ ಟಾಸ್ಕ್ ಫೋರ್ಸ್ ದೂರು ದಾಖಲಿಸಿಕೊಂಡು, ಬಿಡಿಎ ಇಂಜಿನಿಯರ್‌ಗಳಾದ ಕೃಷ್ಣಮೂರ್ತಿ, ರವಿಕುಮಾರ್, ಶ್ರೀನಿವಾಸ್, ಶಬ್ಬೀರ್ ಅಹ್ಮದ್, ಎಂ.ಎಂ ಫಾರೂಖ್ ಸೇರಿ ಹಲವರ ಮೇಲೆ ವಿಚಾರಣಾ ನ್ಯಾಯಾಲಯಕ್ಕೆ ದೋಷಾರೋಪ ವರದಿ ಸಲ್ಲಿಸಿದ್ರು. ಆದ್ರೆ, ಕಿಲಾಡಿ ಕೇಡಿಗಳು ನ್ಯಾಯಾಲಯದಿಂದ ತಡಯಾಜ್ಞೆ ತಂದು ಆಯಕಟ್ಟಿನ ಜಾಗಗಳಲ್ಲೇ ಕೂತಿದ್ದಾರೆ. ಆರೋಪಿತರ ವಿರುದ್ಧ ಪ್ರಾಸಿಕ್ಯೂಶನ್‌ಗೆ ಅನುಮತಿ ನೀಡಲು ಸರ್ಕಾರವೂ ಹಿಂದೇಟು ಹಾಕ್ತಿರೋದನ್ನು ನೋಡಿದ್ರೆ ಹಲವು ಅನುಮಾನಗಳು ವ್ಯಕ್ತವಾಗ್ತಿವೆ. ಇದೇ ಅಲ್ಲದೇ ತಡೆಯಾಜ್ಞೆಯನ್ನ ತೆರವುಗೊಳಿಸಲು ಬಿಡಿಎ ಲೀಗಲ್ ಸೆಲ್ ವಕೀಲರು ಮೀನಾಮೇಷ ಎಣಿಸುತ್ತಿದ್ದಾರೆ. ಏಜೆಂಟ್ ಇಂದ್ರ ಕುಮಾರ್ ಮನೆ ಮೇಲೆ ರೇಡ್ ಆದಾಗ, ಹತ್ತಾರು ಸಿಡಿಆರ್‌ಗಳು ದೊರೆತಿದ್ವು. ಏಜೆಂಟ್ ಜೊತೆ ಸೇರಿ ನಕಲಿ ದಾಖಲೆ ಸೃಷ್ಟಿಸಿದ ಬಗ್ಗೆಯೂ ಸಾಕ್ಷಿ ಸಿಕ್ಕಿತ್ತು. ಹೀಗಿದ್ರೂ ತಪ್ಪಿತಸ್ಥರ ಮೇಲೆ ಬಿಡಿಎ ಸಾಫ್ಟ್ ಕಾರ್ನರ್ ತೋರ್ತಿದೆ.

ಒಟ್ನಲ್ಲಿ ಪ್ರಾಧಿಕಾರದ ಅಧಿಕಾರಿಗಳು, ಕಾನೂನು ಕೋಶದ ವೈಫಲ್ಯದಿಂದ ಸುಮಾರು 50 ಸಾವಿರ ಕೋಟಿ ಮೌಲ್ಯದ ಬಿಡಿಎ ಆಸ್ತಿ ಕಂಡೋರ ಪಾಲಾಗಿದೆ. ಈ ಕೇಸನ್ನೂ ಒಳಗೊಳಗೇ ಮುಚ್ಚಿ ಹಾಕೋ ಷಡ್ಯಂತ್ರಗಳು ನಡೀತಿವೆ. ಮಾನ್ಯ ಆಯುಕ್ತರು, ಅಧ್ಯಕ್ಷರು ಇನ್ನಾದರೂ ಎಚ್ಚೆತ್ತುಕೊಳ್ಳದಿದ್ರೆ, ನುಂಗಣ್ಣರು ಬರ್ಬಾದ್ ಮಾಡಿ ಬಿಡುತ್ತಾರೆ‌‌.

ಗ್ಯಾಬ್ಲಿಂಗ್ ಆಟಕ್ಕೆ 32 ಲಕ್ಷ ಹಣ ಕಳೆದುಕೊಂಡಿದ್ದ ಭೂಪ..!

ಬೆಂಗಳೂರು: ಇಸ್ಪೀಟ್ ಆಟದಲ್ಲಿ ಗೆಲ್ಲೋದಕ್ಕಿಂತ ಸೋಲೋದೆ ಜಾಸ್ತಿ. ಲಕ್ ಚೆನ್ನಾಗಿದ್ರೆ ಕೈ ತುಂಬಾ ದುಡ್ಡು ಮಾಡಬಹುದು.ಅದೇ ಲಕ್ ಕೈಕೊಟ್ರೆ ಮನೆ ಮಠ ಎಲ್ಲಾ ಮಾರಿಕೊಂಡು‌, ಮೈತುಂಬಾ ಸಾಲ ಮಾಡಿಕೊಂಡು ಬೀದಿಗೆ ಬರಬೇಕಾಗುತ್ತೆ. ಅದೇ ತರ ಇಲ್ಲೊಬ್ಬ ವ್ಯಕ್ತಿ ಈ ಇಸ್ಪೀಟ್ ಆಟ ನಂಬಿಕೊಂಡು ಬೀದಿಗೆ ಬಂದಿದ್ದಲ್ಲದೆ ಸಂಬಂಧದಲ್ಲೂ ಮಾನ ಕಳೆದುಕೊಂಡು ಪೊಲೀಸರ ಅತಿಥಿಯಾಗಿದ್ದಾನೆ.‌ ಬ್ಯಾಟರಾಯನಪುರ ‌ನಿವಾಸಿ ಅಜಿತ್ ಬಂಧಿತ ಆರೋಪಿ.

ಅಂದ ಹಾಗೆ ಈ ಅಜಿತ್‌ ಇಸ್ಟೀಟ್ ಆಡಲು 32 ಲಕ್ಷ ಹಣ ಸಾಲ ಮಾಡಿದ್ದ. ಆ ಸಾಲ ತೀರಿಸಲು ಸ್ವಂತ ಚಿಕ್ಕಮ್ಮನ ಮನೆಯಲ್ಲಿ ಅಕ್ಷಯ ತೃತೀಯ ದಿನವೇ 613 ಗ್ರಾಂ ಚಿನ್ನಾಭರಣ ಕದ್ದು ಮಾರಾಟ ಮಾಡಿದ್ದ.  ಇನ್ನು ಇದೇ ಬ್ಯಾಟರಾಯನಪುರ ಪೊಲೀಸರು ಮತ್ತೆರಡು ಪ್ರಕರಣಗಳನ್ನು ಪತ್ತೆ ಮಾಡಿದ್ದಾರೆ . ನಗರದಲ್ಲಿ ಬೈಕ್‌ಗಳನ್ನು ಕಳ್ಳತನ ಮಾಡ್ತಿದ್ದ ಆನಂದ್ ಹಾಗೂ ಮತ್ತೊಬ್ಬ ಮನೆಗಳ್ಳತನ ಪ್ರಕರಣದ ಆರೋಪಿ ಅನ್ಸರ್ ಎಂಬುವನನ್ನು ಬಂಧಿಸಿದ್ದಾರೆ.

ಒಟ್ಟಾರೆ ಬ್ಯಾಟರಾಯನಪುರ ಪೊಲೀಸರು ಮೂರು ಪ್ರಕರಣಗಳನ್ನು ಪತ್ತೆ ಮಾಡಿದ್ದಾರೆ. ಒಟ್ಟು 61 ಲಕ್ಷ ಮೌಲ್ಯದ ಚಿನ್ನಾಭರಣ ಹಾಗೂ 20ಕ್ಕೂ ಹೆಚ್ಚು ಬೈಕ್‌ಗಳನ್ನು ವಶಕ್ಕೆ ಪಡೆದು ತನಿಖೆ ಮುಂದುವರೆಸಿದ್ದಾರೆ.

ನಕಲಿ ದಾಖಲಾತಿ ಸೃಷ್ಟಿಸಿ ನಿವೇಶನ ಮಾರಾಟ

ಬೆಂಗಳೂರು: ಕಂಡ ಕಂಡ ಖಾಲಿ ಸೈಟು ಗುರುತಿಸಿ ಮಾಲೀಕರ ಹೆಸರಿನಲ್ಲಿ ನಕಲಿ ದಾಖಲಾತಿ ಸೃಷ್ಟಿಸಿ ಬೇರೆಯವರಿಗೆ ಮಾರಿ ಲಕ್ಷಾಂತರ ರೂಪಾಯಿ ಅಕ್ರಮವಾಗಿ ಸಂಪಾದಿಸಿದ್ದ ಐವರನ್ನು ವಿದ್ಯಾರಣ್ಯಪುರ‌ ಪೊಲೀಸರು ಬಂಧಿಸಿದ್ದಾರೆ. ನರಸೀಪುರ ನಿವಾಸಿ ಸುವರ್ಣಮ್ಮ‌ ಎಂಬುವರು ನೀಡಿದ‌ ದೂರಿನ ಮೇರೆಗೆ ಕಬೀರ್ ಆಲಿ, ಫೈಜ್ ಸುಲ್ತಾನ, ಕಲ್ಪನಾ, ಯೋಗೇಶ್ ಹಾಗೂ ಪೂಜಾ ಎಂಬುವರನ್ನು ಬಂಧಿಸಿ‌ ಜೈಲಿಗಟ್ಟಲಾಗಿದೆ.‌

ಹೆಚ್ಎಂಟಿ ಕಂಪನಿಯ ನಿವೃತ್ತ ಉದ್ಯೋಗಿ ಸುವರ್ಣಮ್ಮ ಎಂಬುವರಿಗೆ 1988ರಲ್ಲಿ‌ ಹೆಚ್ಎಂಟಿ‌ ಲೇಔಟ್ ನಲ್ಲಿ ಸೈಟ್ ಹಂಚಿಕೆಯಾಗಿತ್ತು. ಆದ್ರೆ ಆರೋಪಿಗಳು ಸುವರ್ಣಮ್ಮಗೆ ಗೊತ್ತಾಗದಂತೆ ತಮ್ಮ ಹೆಸರಿನಲ್ಲಿ ರಿಜಿಸ್ಟ್ರೇಷನ್ ಮಾಡಿಸಿಕೊಂಡಿದ್ದರು. ಕೆಲ ತಿಂಗಳ ಬಳಿಕ ಸುವರ್ಣಮ್ಮ ಸೈಟ್ ಬಳಿ ತೆರಳಿದ್ದಾಗ ತನ್ನ‌ ಹೆಸರಿನ ಮೂಲಕವೇ ಸೈಟ್ ಮಾರಾಟ ಮಾಡಿ ವಂಚಿಸಲಾಗಿದೆ ಎಂದು ಗೊತ್ತಾಗಿತ್ತು.‌ ತಕ್ಷಣ ಸುವರ್ಣಮ್ಮ ವಿದ್ಯಾರಣ್ಯಪುರ‌ ಠಾಣೆಗೆ ದೂರು ನೀಡಿದ್ರು.

ಆರೋಪಿಗಳು ಕಬೀರ್ ಆಲಿ ನಗರದಲ್ಲಿ ಖಾಲಿ ಸೈಟುಗಳನ್ನು ಗುರುತಿಸಿಕೊಂಡು ಅಕ್ಕಪಕ್ಕದವರನ್ನು ವಿಚಾರಿಸಿ ಸೈಟು ಮಾಲೀಕರ ಹೆಸರು ಹಾಗೂ ವಿವರಗಳನ್ನು‌ ಪಡೆದುಕೊಳ್ಳುತ್ತಿದ್ದರು. ಅದೇ ರೀತಿ ಸುವರ್ಣಮ್ಮಗೆ ಸೇರಿದ‌ ಸೈಟಿನ ಕಾಗದ ಪತ್ರಗಳನ್ನು ನಕಲಿಯಾಗಿ ಸೃಷ್ಟಿಸಿಕೊಂಡಿದ್ದರು. ಸುವರ್ಣಮ್ಮರ ಮಗಳು ಎಂದು ಕಲ್ಪನಾಳನ್ನ ರೆಡಿ ಮಾಡಿ ಆಕೆಗೆ ದಾನ ಮಾಡಿರುವುದಾಗಿ, ಆಕೆಯಿಂದ ಆಕೆಯ ಗಂಡ ಯೋಗೇಶ್ ಸೈಟು ಹಸ್ತಾಂತರಿಸಿದ್ದ. ಬಳಿಕ ಪೈಜ್ ಸುಲ್ತಾನ ಹೆಸರಿನಲ್ಲಿ ಅಗ್ರಿಮೆಂಟ್ ಮಾಡಿಕೊಂಡು ಮತ್ತೋರ್ವ ಆರೋಪಿ ಯೊಗೇಶ್ ಮುಖಾಂತರ ವೆಂಕಟಸ್ವಾಮಿ ಅವರಿಗೆ 65 ಲಕ್ಷ ರೂಪಾಯಿಗೆ ಮಾರಿದ್ದಾರೆ. ಬಂದ ಹಣದಲ್ಲಿ‌ ಸಹಚರರಿಗೆ ಕಮಿಷನ್ ನೀಡಿ ಉಳಿದ ಹಣವನ್ನು ಕಬೀರ್ ಹಾಗೂ ಫೈಜ್ ಸುಲ್ತಾನ ಮೋಜು ಮಸ್ತಿ ಮಾಡಿದ್ರು.

ವಿಚಿತ್ರವೆಂದ್ರೆ ವಂಚನೆ‌ ಪ್ರಕರಣದಲ್ಲಿ ಪ್ರಮುಖ‌ ಆರೋಪಿಯಾಗಿರುವ ಪೈಜ್ ಸುಲ್ತಾನ ಪಧವೀಧರೆ.ಈಕೆ ವೈಯಕ್ತಿಕ ಕಾರಣಕ್ಕಾಗಿ ಗಂಡನನ್ನು ತೊರೆದಿದ್ದಳು‌. ಪರಿಚಿತ ಕಬೀರ್ ಜೊತೆ ಸೇರಿ ವಂಚನೆ‌ ಮಾರ್ಗ ಕಂಡುಕೊಂಡಿದ್ದಳು. ಪೊಲೀಸರಿಗೆ ಅನುಮಾನ ಬಾರದಿರಲು ನಕಲಿ ಆಧಾರ್ ಕಾರ್ಡ್, ಪ್ಯಾನ್ ಕಾರ್ಡ್ ಮಾಡಿಸಿಕೊಂಡಿದ್ದರು.‌ಹಣ ಬ್ಯಾಂಕಿನಲ್ಲಿ ಜಮೆಯಾಗುತ್ತಿದ್ದಂತೆ ಆರೋಪಿಗಳು ಮೊಬೈಲ್ ಸ್ವಿಚ್ ಆಫ್ ಮಾಡಿಕೊಳ್ಳುತ್ತಿದ್ದರು.ಸದ್ಯ ಆರೋಪಿಗಳನ್ನು ಬಂಧಿಸಿರುವ ಪೊಲೀಸರು 102 ಗ್ರಾಂ ಚಿನ್ನಾಭರಣ ಹಾಗೂ ಕೃತ್ಯಕ್ಕೆ ಬಳಸಿದ್ದ ಟಾಟಾ ಸಫಾರಿ ಕಾರು ಜಪ್ತಿ ಮಾಡಿಕೊಂಡಿದ್ದಾರೆ.

ರಾಜ್ಯದಲ್ಲಿ ಮುಂಗಾರು ಪೂರ್ವ ಮಳೆ ಅಬ್ಬರ

ಬೆಂಗಳೂರು: ಕರ್ನಾಟಕದಲ್ಲಿ ಮುಂಗಾರು ಪೂರ್ವ ಮಳೆಯ ಅಬ್ಬರ ಜೋರಾಗಿದೆ. ರಾಜ್ಯಾದ್ಯಂತ ಅಬ್ಬರಿಸಿ ಬೊಬ್ಬಿರಿಯುವತ್ತಿರುವ ಮಳೆಯ ಮಧ್ಯೆ ಹವಾಮಾನ ಇಲಾಖೆ ಎಚ್ಚರಿಕೆ ಕೊಟ್ಟಿದ್ದು, ಮತ್ತೆ ಮೂರು ದಿನ ಭಾರಿ ಮಳೆ ಮಳೆ ಮುನ್ಸೂಚನೆ ನೀಡಿದ್ದಾರೆ. ದಕ್ಷಿಣ ಒಳನಾಡು, ಕರಾವಳಿ ಸೇರಿ ರಾಜ್ಯದ 7 ಜಿಲ್ಲೆಗಳಲ್ಲಿ ರೆಡ್ ಅಲರ್ಟ್ ಘೋಷಣೆ ಮಾಡಲಾಗಿದೆ. ಉತ್ತರ ಒಳನಾಡಿನಲ್ಲಿ ಎರಡು ದಿನ ಯೆಲ್ಲೋ ಅಲರ್ಟ್‌ ಘೋಷಣೆ ಮಾಡಲಾಗಿದ್ದು, ಮೀನುಗಾರಿಕೆಗೆ ಬ್ರೇಕ್‌ ಹಾಕಲಾಗಿದೆ.

ರಾಜಧಾನಿ ಬೆಂಗಳೂರಿನ ಜನರಿಗೆ ಮಳೆ ಕೊಂಚ ಬಿಡುವು ನೀಡಿದೆ. ಆದರೂ ಮೋಡ ಕವಿದ ವಾತಾವರಣದ ಜೊತೆ ಚಳಿ ಗಾಳಿ ಮುಂದುವರೆದಿದೆ. ಇನ್ನು ಮಳೆ ನಿಂತರೂ ಅದರಿಂದ ಉಂಟಾದ ಅವಾಂತರಗಳು ಮುಂದುವರೆದಿದೆ. ಹಲವು ಕಡೆ ತಗ್ಗು ಪ್ರದೇಶಗಳಲ್ಲಿ ಮನೆಗಳಿಗೆ ಕೊಳಚೆ ನೀರು ನುಗ್ಗಿದ್ದು, ಜನಜೀವನ ಅಸ್ತವ್ಯಸ್ತವಾಗಿದೆ. ಈ ಹಿನ್ನೆಲೆಯಲ್ಲಿ ಸಿಎಂ ಬಸವರಾಜ ಬೊಮ್ಮಾಯಿ ಮಳೆ ಹಾನಿ ಪ್ರದೇಶಗಳಿಗೆ ಮಚ್ಚೆ ಭೇಟಿ ನೀಡಿದ್ರು. ರಾಮಮೂರ್ತಿ ನಗರ, ಹೊರಮಾವು ಶ್ರೀಸಾಯಿ ಲೇಔಟ್ ಸೇರಿದಂತೆ ಕೆಲವು ಪ್ರದೇಶಗಳಿಗೆ ಭೇಟಿ ನೀಡಿದ ಸಿಎಂ, ಸ್ಥಳೀಯರ ಸಮಸ್ಯೆ ಆಲಿಸಲೇ ಇಲ್ಲ. ಕೇವಲ ಅಧಿಕಾರಿಗಳು, ಇಂಜಿನಿಯರ್ ಕೊಡುವ ಮಾಹಿತಿ ಪಡೆದು ವಾಪಸ್ಸಾಗಿದ್ದಾರೆ.

ಸಿಎಂ ಕೇವಲ ಕಾಟಾಚಾರಕ್ಕೆ ಭೇಟಿ ಕೊಟ್ರು, ನಮ್ಮ ಅಹವಾಲು ಕೇಳಲಿಲ್ಲ. ಒಳಗೆ ಬಂದು ಏನೆಂದು ಪರಿಸ್ಥಿತಿ ನೋಡಲಿಲ್ಲ, ರಸ್ತೆಯಲ್ಲೇ ನಿಂತು ನೋಡಿ ಹೊರಟರು ಅಂತ ಜನ ಆಕ್ರೋಶ ಹೊರಹಾಕಿದ್ರು. ಬರೀ ಆಶ್ವಾಸನೆ ಕೊಟ್ಟು ಹೋಗ್ತಿದ್ದಾರೆ. ಅಲ್ಲೇ ನಿಂತು ಹೋಗೋಕೆ ಯಾಕೆ ಬರ್ಬೇಕು ಅಂತ ಪ್ರಶ್ನಿಸಿದ್ರು.

ದಾಸರಹಳ್ಳಿ ವಿಧಾನಸಭಾ ಕ್ಷೇತ್ರದಲ್ಲಿ ಹಾನಿಗೊಳಗಾದ ಪ್ರದೇಶಗಳಿಗೆ ಮಾಜಿ ಸಿಎಂ ಹೆಚ್.ಡಿ ಕುಮಾರಸ್ವಾಮಿ ಭೇಟಿ ನೀಡಿ ಜನರ ಸಮಸ್ಯೆ ಆಲಿಸಿದ್ರು. ದಾಸರಹಳ್ಳಿಯ ವಿವಿಧ ಬಡಾವಣೆಗೆ ಭೇಟಿ ನೀಡಿದ ಕುಮಾರಸ್ವಾಮಿ ಅವರು‌ ಮೊದಲಿಗೆ ರುಕ್ಮಿಣಿ ನಗರದ ರಾಜಕಾಲುವೆ ಪರಿಶೀಲನೆ ನಡೆಸಿದ್ರು. ಬಳಿಕ ಸಿದ್ದಾರ್ಥ ಕಾಲೋನಿಗೆ ಭೇಟಿ ಕೊಟ್ಟು, ಜನರು ಸಮಸ್ಯೆಗಳನ್ನು ಕೇಳಿದ್ರು. ಜನರಿಗೆ ಫುಡ್ ಕಿಟ್ ವಿತರಣೆ ಮಾಡಿದ್ರು, ಜೊತೆಗೆ ಧನ ಸಹಾಯ ಮಾಡಿದ್ರು ಬಳಿಕ ಮಾತನಾಡಿದ ಮಾಜಿ ಸಿಎಂ ಹೆಚ್.ಡಿ.ಕುಮಾರಸ್ವಾಮಿ ಕಾಂಗ್ರೆಸ್ ಮತ್ತು ಬಿಜೆಪಿ ವಿರುದ್ಧ ವಾಗ್ದಾಳಿ‌ ನಡೆಸಿದ್ರು.

ಸಿಎಂ ಕಾಟಾಚಾರಕ್ಕೆ ಭೇಟಿ ಕೊಟ್ಟು ಹೋಗ್ತಿದ್ದಾರೆ. ವಿಪಕ್ಷ ನಾಯಕರ ರೌಂಡ್ಸ್‌ ಕೂಡ ಅಷ್ಟಕ್ಕೆ ಅಷ್ಟೆ. ಈ ಮಧ್ಯೆ, ಕುಮಾರಸ್ವಾಮಿ ಕೂಡ ಮಳೆ ಪೀಡಿತ ಪ್ರದೇಶಗಳಿಗೆ ಭೇಟಿ ನೀಡಿ ಜನರಿಗೆ ಕೊಂಚ ಧೈರ್ಯ ತುಂಬಿ ಬಂದಿದ್ದಾರೆ. ಆದ್ರೆ, ನಮ್ಮ ನಾಡದೊರೆಗೆ ಯಾಕೆ ಈ ತಾತ್ಸಾರ ಅಂತ ಜನರು ಕಿಡಿ ಕಾರುತ್ತಿದ್ದಾರೆ.

ಉತ್ತರಕನ್ನಡಕ್ಕೆ ಕಾದಿದೆಯಾ ಭೂ ಕಂಟಕ..?

ಕಾರವಾರ: ಉತ್ತರಕನ್ನಡ ಜಿಲ್ಲೆಯ ಐದು ಸ್ಥಳದಲ್ಲಿ ಭಾರಿ ಭೂಕುಸಿತವಾಗಲಿದೆ ಎಂದು ಜಿಯಾಲಜಿಕಲ್ ಸರ್ವೆ ಆಫ್ ಇಂಡಿಯಾ ಎಚ್ಚರಿಸಿದೆ. ಕೈಗಾ ಅಣುಸ್ಥಾವರ, ಕೊಡಸಳ್ಳಿ ಡ್ಯಾಮ್ ಸುತ್ತಮುತ್ತಲಿನ ಪ್ರದೇಶ ಅಪಾಯದಲ್ಲಿದೆ ಅಂತಾ ವರದಿ ಮಾಡಲಾಗಿದೆ. ರಾಜ್ಯದಲ್ಲಿರುವ ಏಕೈಕ ಅಣುವಿದ್ಯುತ್ ಸ್ಥಾವರಕ್ಕೆ ಅಪಾಯ ಕಾದಿದ್ಯಾ ಅನ್ನೋ ಆತಂಕ ಹೆಚ್ಚಾಗಿದೆ.

ಕಳೆದ ವರ್ಷ ಸುರಿದ ಮಹಾ ಮಳೆಯಿಂದ ಭೂಕುಸಿತವಾಗಿತ್ತು.ಈ ಬೆನ್ನಲ್ಲೇ ಈ ಬಾರಿಯೂ ಗುಡ್ಡ ಕುಸಿಯುವ ಮುನ್ನೆಚ್ಚರಿಕೆ ನೀಡಲಾಗಿದೆ.ಭೂ ಕುಸಿತವಾದ ಅಣಶಿ ಭಾಗದಲ್ಲಿ ಕೈಗಾ ಅಣುಸ್ಥಾವರ ಹಾಗೂ ಕೊಡಸಳ್ಳಿ ಡ್ಯಾಮ್‌ಗಳು ಇದ್ದು ಸದ್ಯ ಸುತ್ತಮುತ್ತಲೂ ಗುಡ್ಡ ನಿರಂತರ ಕುಸಿಯುತ್ತಿದೆ. ಇನ್ನು ಯಲ್ಲಾಪುರ ಭಾಗದ ಕಳೆಚೆಯಲ್ಲಿ ಚಿಕ್ಕ ಹಳ್ಳದಲ್ಲಿ ದೊಡ್ಡ ಕಂದಕ ನಿರ್ಮಾಣವಾಗಿದೆ.ಈ ಭಾಗದಲ್ಲಿ 331ಮನೆಗಳಿದ್ದು, 1212 ಜನರು ವಾಸವಾಗಿದ್ದಾರೆ. ಆದ್ರೆ, ಇಲ್ಲಿನ ಜನರನ್ನು ಈವರೆಗೂ ಸ್ಥಳಾಂತರ ಮಾಡಿಲ್ಲ. ಹೀಗಾಗಿ ಇದೀಗ ಕೇಂದ್ರ ಅಧ್ಯಯನ ತಂಡದ ವರದಿ ಈ ಭಾಗದ ಜನರಲ್ಲಿ ಮತ್ತಷ್ಟು ಆತಂಕವನ್ನುಂಟು ಮಾಡಿದ್ದು ಜಿಲ್ಲಾಧಿಕಾರಿಗಳು ಜನರಿಗೆ ಯಾವುದೇ ತೊಂದರೆ ಆಗದಂತೆ ನೋಡಿಕೊಳ್ಳುತ್ತೇವೆ ಅಂತಿದ್ದಾರೆ.

ಒಟ್ಟಾರೆ ಸದ್ಯ ಅಸಾನಿ ಚಂಡಮಾರುತದಿಂದ ಜಿಲ್ಲೆಯ ಕೆಲವು ಭಾಗದಲ್ಲಿ ಮಾತ್ರ ಒಂದಿಷ್ಟು ಹಾನಿಯಾಗಿದೆ.ಆದ್ರೆ, ಮತ್ತೆ ಹೆಚ್ಚಿನ ಮಳೆ ಬಂದರೆ ಭೂಕುಸಿತವಾಗಿ ಅಪಾರ ಹಾನಿ ಸಂಭವಿಸುವ ಸಾಧ್ಯತೆಗಳಿದೆ. ಇನ್ನಾದರೂ ಜಿಲ್ಲಾಡಳಿತ ಎಚ್ಚೆತ್ತು ಭೂ ಕುಸಿತವಾದ ಜನವಸತಿ ಸ್ಥಳದಿಂದ ಜನರನ್ನು ಬೇರೆಡೆ ಸ್ಥಳಾಂತರಿಸಬೇಕಿದೆ.

ಕಾನ್ಸ್​​​​ನಲ್ಲಿ ಭಾರತೀಯರ ಕಲರವ.. ಯಶ್ ಯಾಕಿಲ್ಲ..?

ಇಡೀ ವಿಶ್ವವೇ ಕನ್ನಡ ಸಿನಿಮಾ ಕಡೆ ಬೆರಗು ಗಣ್ಣಿನಿಂದ ನೋಡುವಂತೆ ಮಾಡಿದ್ದು ನಮ್​​ ನ್ಯಾಷನಲ್​​ ಸ್ಟಾರ್​ ರಾಕಿಭಾಯ್​​​. ಹಾಲಿವುಡ್​ಗೂ  ಭಾರತೀಯ ಸಿನಿಮಾಗಳ  ತಾಕತ್ತನ್ನು ತೋರಿಸಿಕೊಟ್ಟ ಹೆಮ್ಮೆಯ ಕನ್ನಡಿಗ ಯಶ್​​. ಇಂಡಿಯನ್​ ಸಿನಿಮಾಗಳ ಪರಾಕ್ರಮವನ್ನು ವಿಶ್ವಕ್ಕೆ ಸಾರಿದ ಮಾಸ್ಟರ್​ಪೀಸ್ ಫ್ಯಾನ್ಸ್​ಗೆ ಇಂದು ಸಖತ್​ ಬೇಜಾರಾಗಿದೆ.

  • ಸಿನಿಹಬ್ಬ ‘ಕಾನ್ಸ್​​ ಫೆಸ್ಟಿವಲ್’​ಗೆ ರಾಕಿಭಾಯ್​​ ಮಿಸ್​​ 
  • ನ್ಯಾಷನಲ್​ ಸ್ಟಾರ್​​ ಅಭಿಮಾನಿಗಳಿಗೆ ಸಖತ್​​ ಬೇಸರ
  • ಟಾಲಿವುಡ್​​, ಬಾಲಿವುಡ್​​ ಸೂಪರ್​ ಸ್ಟಾರ್ಸ್​​ ಹಾಜರ್​
  • ಪೂಜಾ​​, ತಮನ್ನಾ, ದೀಪಿಕಾ ರ್ಯಾಂಪ್​ ವಾಕ್ ಸೂಪರ್​

‘ಇದು ನನ್ ಟೆರಿಟರಿ, ಇದು ನಿನ್ ಟೆರಿಟರಿ ಅನ್ನೋದನ್ನು ಬಿಟ್ಬಿಡಿ. ದಿ ವರ್ಲ್ಡ್​ ಇಸ್​ ಮೈ ಟೆರಿಟರಿ’ ಹೀಗಂತ ರಾಕಿಭಾಯ್​ ಇಡೀ ವಿಶ್ವಕ್ಕೆ ಎಚ್ಚರಿಕೆ ಕೊಟ್ಟಿದ್ರು. ಕಾಲ ಕಾಲದಿಂದ ನೆಪೋಟಿಸಂಗೆ ಬಲಿಯಾಗಿದ್ದ ಅನೇಕ ಕಲಾವಿದರ ಪರವಾಗಿ ಗುಡುಗಿದ್ದ ರಾಕಿಭಾಯ್,​​ ಕನ್ನಡಿಗರ ಗತ್ತು, ಗಮ್ಮತ್ತು, ತಾಕತ್ತನ್ನು ಚಿತ್ರಲೋಕಕ್ಕೆ ಗೊತ್ತು ಮಾಡಿದ್ರು. ಎಲ್ಲಾ ವುಡ್​ಗಳು ಬಸ್​ ಡ್ರೈವರ್​ ಮಗನ ಹೊಸ ರೂಲಿಂಗ್​ಗೆ ಬೆಚ್ಚಿಬಿದ್ರು. ಇದು ನಮ್​ ರಾಕಿಭಾಯ್​​ ಪವರ್​​.

‘ಕೆಜಿಎಫ್​​-2’ ಸಿನಿಮಾದಿಂದ ಗ್ಲೋಬಲ್​ ಲೆವೆಲ್​ ರೀಚ್​​ ಆಗಿರೋ ರಾಕಿಭಾಯ್​​ ಯಶ್​​ರನ್ನು ಇಡೀ ವಿಶ್ವವೇ ಕೊಂಡಾಡ್ತಿದೆ. 1500 ಕೋಟಿ ಕ್ಲಬ್​​ ಸೇರಿರೋ ವಿಶ್ವದಾಖಲೆ ಸಿನಿಮಾದ ಸರದಾರ ನಮ್​ ರಾಕಿಭಾಯ್​. ‘ಕೆಜಿಎಫ್​’ ಚಿತ್ರಕ್ಕೆ ಸೆಡ್ಡು ಹೊಡೆದ ಚಿತ್ರಗಳು ‘ಕೆಜಿಎಫ್’ ಎದ್ರು ಮಂಡಿಯೂರಿವೆ. ಅಖಾಡದಲ್ಲಿ ತೊಡೆತಟ್ಟಿದ ಸಿನಿಮಾಗಳು ಸೈಲೆಂಟ್​ ಆದ್ವು. ರಾಕಿಭಾಯ್​​ ಸ್ಟಾರ್​ಡಮ್​ ಹಾಲಿವುಡ್​​ನಲ್ಲೂ ಸಂಚಲನ ಮೂಡಿಸಿರೋವಾಗ, ಅಂತಾರಾಷ್ಟ್ರೀಯ ಕಾನ್ಸ್​​ ಸಿನಿಹಬ್ಬದಲ್ಲಿ ಯಶ್​ ಮಿಸ್​ ಆಗಿರೋದು ಎಲ್ರಿಗೂ ಸಖತ್​ ಬೇಸರ ಮೂಡಿಸಿದೆ.

17ನೇ ‘ಕಾನ್ಸ್​ ಫಿಲ್ಮ್​​ ಫೆಸ್ಟಿವಲ್’​ ಬಿಗ್​ ಓಪನಿಂಗ್​ ಕಂಡಿದೆ. ಈ ಸಿನಿಮಾ ಉತ್ಸವದಲ್ಲಿ ವಿಶ್ವದ ಜನಪ್ರಿಯ ಸಿನಿಮಾಗಳ ಪ್ರದರ್ಶನ ನಡೆಯುತ್ತೆ. ಈ ಬಾರಿಯ ಫೆಸ್ಟಿವಲ್​​ನಲ್ಲಿ ಜ್ಯೂರಿಯಾಗಿ ನಮ್ಮ ಕನ್ನಡತಿ ದೀಪಿಕಾ ಪಡುಕೋಣೆ ಕಾಣಿಸಿಕೊಂಡಿದ್ದು ವಿಶೇಷ. ತಮನ್ನಾ, ಮಂಗಳೂರು ಮೂಲದ ಪೂಜಾ ಹೆಗ್ಡೆ, ಊರ್ವಶಿ, ರೆಹಮಾನ್​, ರಿಕ್ಕಿ ಕೇಜ್​, ಕಮಲ್ ಹಾಸನ್​ ಸೇರಿದಂತೆ ಭಾರತೀಯ ಸ್ಟಾರ್​ ಕಲಾವಿದರಿಂದ ಕಾನ್ಸ್ ರಂಗೇರಿದೆ.

ಇಡೀ ಪ್ರಪಂಚಕ್ಕೆ ಅತಿ ಹೆಚ್ಚು ಸಿನಿಮಾಗಳ ನಿರ್ಮಾಣದಲ್ಲಿ ಭಾರತ ದೇಶದ ಕೊಡುಗೆ ದೊಡ್ಡದು. ಇದ್ರ ಜೊತೆಗೆ, ಹಾಲಿವುಡ್ ಚಿತ್ರಗಳನ್ನು ಕಾಪಿ ಪೇಸ್ಟ್​ ಮಾಡೋ ಚೀಪ್​ ಮೆಂಟಾಲಿಟಿಯಿಂದ ಭಾರತೀಯ ಚಿತ್ರರಂಗ ಹೊರ ಬಂದಿದೆ. ನಮ್ ಟೆಕ್ನಾಲಜಿಯನ್ನು ಹಾಲಿವುಡ್​ ಕೂಡ ಕಣ್ಣರಳಿಸಿ ನೋಡೋ ಕಾಲ ಬಂದಿದೆ. ಅದಕ್ಕೆ ಬೆಸ್ಟ್​​ ಎಗ್ಸಾಂಪಲ್​ ‘ಕೆಜಿಎಫ್​​’ ಹಾಗೂ ಬಾಹುಬಲಿ ಸಿನಿಮಾಗಳು.

ವಿಶ್ವವನ್ನೆ  ಥಂಡಾ ಹೊಡೆಸಿದ  ನರಾಚಿ ನಾಯಕನಿಗೆ ‘ಕಾನ್ಸ್​ ಫಿಲ್ಮ್​ ಫೆಸ್ಟಿವಲ್​’ಗೆ ಆಹ್ವಾನ ನೀಡೋ ಮೂಲಕ ಹೊಸ ಪ್ರಯತ್ನಗಳಿಗೆ ಪ್ರೋತ್ಸಾಹ ನೀಡ್ಬೋದಿತ್ತು ಅನ್ನೋದು ಕನ್ನಡಿಗರ ಆಶಯ. ಆದ್ರೆ ರಾಕಿಭಾಯ್​ನ ಅವಾಯ್ಡ್ ಮಾಡಿರೋ ಕಾನ್ಸ್, ಮುಂದೊಂದು ದಿನ ಕಾಲಿಡಿದು ಆಮಂತ್ರಣ ನೀಡೋ ಸಮಯ ಬರಲಿದೆ. ಎನಿವೇ ರಾಕಿಭಾಯ್​ಗೆ ಸಿಗಬೇಕಾದ ಗೌರವ, ಮನ್ನಣೆ ಈಗಾಗ್ಲೇ ಪ್ರೇಕ್ಷಕರೇ ನೀಡಿ ಆಗಿದೆ.

ರಾಕೇಶ್​​ ಆರುಂಡಿ, ಫಿಲ್ಮ್​ ಬ್ಯೂರೋ, ಪವರ್​ ಟಿವಿ