ಬೆಂಗಳೂರು, ಸೆಪ್ಟೆಂಬರ್ 16, 2026:
ರಿಯಾದ್, ಸೆಪ್ಟೆಂಬರ್ 16: ಇಸ್ಲಾಂ ಧರ್ಮದ ಅತ್ಯಂತ ಪವಿತ್ರ ನಗರವಾದ ಮೆಕ್ಕಾದ ದಕ್ಷಿಣ ಭಾಗದಲ್ಲಿ ಯೆಮೆನ್ನ ಹೌತಿ ಬಂಡುಕೋರರು ಹಾರಿಸಿದ್ದ ಸ್ಫೋಟಕ ಡ್ರೋನ್ ಒಂದನ್ನು ರಾಯಲ್ ಸೌದಿ ವಾಯು ರಕ್ಷಣಾ ಪಡೆ ಯಶಸ್ವಿಯಾಗಿ ಹೊಡೆದುರುಳಿಸಿದೆ. ಡ್ರೋನ್ ಮೆಕ್ಕಾದ ನಿರ್ಬಂಧಿತ ವಾಯುಪ್ರದೇಶವನ್ನು ಪ್ರವೇಶಿಸುವ ಮುನ್ನವೇ ಹೊಡೆದು ನಾಶಪಡಿಸಲಾಗಿದೆ ಎಂದು ಸೌದಿ ನೇತೃತ್ವದ ಒಕ್ಕೂಟ ತಿಳಿಸಿದೆ.
ಈ ಕೃತ್ಯವನ್ನು ಕಟುವಾಗಿ ಖಂಡಿಸಿರುವ ಸೌದಿ ಸೇನೆ, ಮೆಕ್ಕಾ ಮತ್ತು ಮದೀನಾ ಪವಿತ್ರ ಕ್ಷೇತ್ರಗಳು ಹಾಗೂ ಯಾತ್ರಿಕರ ಭದ್ರತೆಯು ತಮಗೆ ಮೊದಲ ಆದ್ಯತೆ ಎಂದು ಹೇಳಿದೆ.
ವಾಯುಪ್ರದೇಶ ಪ್ರವೇಶಿಸುವ ಮುನ್ನವೇ ಧ್ವಂಸ: ಸೌದಿ ಒಕ್ಕೂಟದ ವಕ್ತಾರ ಮೇಜರ್ ಜನರಲ್ ಟರ್ಕಿ ಅಲ್-ಮಲ್ಕಿ ಮಾಹಿತಿ ನೀಡಿ, ಮಂಗಳವಾರ ಸಂಜೆ ಮೆಕ್ಕಾದ ದಕ್ಷಿಣಕ್ಕೆ ಈ ಡ್ರೋನ್ ಪತ್ತೆಯಾಗಿದ್ದು, ಕೂಡಲೇ ವಾಯು ರಕ್ಷಣಾ ವ್ಯವಸ್ಥೆಯ ಮೂಲಕ ಹೊಡೆದುರುಳಿಸಿ ಸಂಭಾವ್ಯ ಅಪಾಯವನ್ನು ತಪ್ಪಿಸಲಾಗಿದೆ ಎಂದು ಹೇಳಿದ್ದಾರೆ.
ಸೌದಿ ಒಕ್ಕೂಟದ ಕಠಿಣ ಎಚ್ಚರಿಕೆ: ಈ ದಾಳಿಯನ್ನು ಭಯೋತ್ಪಾದಕ ಹಾಗೂ ಪ್ರತಿಕೂಲ ಕೃತ್ಯ ಎಂದು ಕರೆದಿರುವ ಸೌದಿ ಒಕ್ಕೂಟ, ಪವಿತ್ರ ಸ್ಥಳಗಳ ಮೇಲೆ ದಾಳಿ ನಡೆಸುವ ಯಾವುದೇ ಪ್ರಯತ್ನವನ್ನು ಸಹಿಸುವುದಿಲ್ಲ ಮತ್ತು ಹೌತಿಗಳ ವಿರುದ್ಧ ಅಗತ್ಯ ಬಿದ್ದರೆ ಯಾವುದೇ ಕಠಿಣ ತಡೆಗಟ್ಟುವ ಕ್ರಮಗಳನ್ನು ಕೈಗೊಳ್ಳಲು ಹಿಂಜರಿಯುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.
2017ರ ಬಳಿಕ ಎರಡನೇ ಯತ್ನ: ಜುಲೈ 2017ರಲ್ಲಿ ಹೌತಿಗಳು ಮೆಕ್ಕಾದ ದಿಕ್ಕಿಗೆ ಬ್ಯಾಲಿಸ್ಟಿಕ್ ಕ್ಷಿಪಣಿ ಹಾರಿಸಿದ್ದರು. ಆ ಘಟನೆಯ ನಂತರ ಪವಿತ್ರ ನಗರವನ್ನು ಗುರಿಯಾಗಿಸಿ ನಡೆಸಲಾದ ಎರಡನೇ ದೊಡ್ಡ ಯತ್ನ ಇದಾಗಿದೆ ಎಂದು ಸೌದಿ ಪಡೆಗಳು ಉಲ್ಲೇಖಿಸಿವೆ.
ಹೌತಿಗಳ ಪ್ರತ್ಯಾರೋಪ: ಇತ್ತ ಮೆಕ್ಕಾವನ್ನು ಗುರಿಯಾಗಿಸಿಕೊಂಡಿದ್ದ ಆರೋಪವನ್ನು ಹೌತಿ ಬಂಡುಕೋರರು ನಿರಾಕರಿಸಿದ್ದಾರೆ. ಬದಲಿಗೆ ಸೌದಿ ಅರೇಬಿಯಾದ ಎಫ್-15 ಮತ್ತು ಟೈಫೂನ್ ಯುದ್ಧವಿಮಾನಗಳು ಯೆಮೆನ್ನ ಶಾಲೆಗಳು, ಸೇತುವೆಗಳು ಮತ್ತು ರಸ್ತೆಗಳು ಸೇರಿದಂತೆ ನಾಗರಿಕ ಪ್ರದೇಶಗಳ ಮೇಲೆ 24ಗಂಟೆಗಳಲ್ಲಿ 52 ವೈಮಾನಿಕ ದಾಳಿಗಳನ್ನು ನಡೆಸಿವೆ ಎಂದು ಹೌತಿ ವಕ್ತಾರ ಯಾಹ್ಯಾ ಸಾರಿ ಆರೋಪಿಸಿದ್ದಾರೆ.
ಜಾಗತಿಕ ತೈಲ ಮತ್ತು ಹಡಗು ಸಾರಿಗೆಗೆ ಸಂಕಷ್ಟ: ಇರಾನ್ ಬೆಂಬಲಿತ ಹೌತಿಗಳು ಕೆಂಪು ಸಮುದ್ರ ಮತ್ತು ಏಡನ್ ಕೊಲ್ಲಿಯನ್ನು ಸಂಪರ್ಕಿಸುವ ಅತ್ಯಂತ ಪ್ರಮುಖ ಸಮುದ್ರ ಮಾರ್ಗವಾದ ಬಾಬ್ ಎಲ್-ಮಂಡೇಬ್ ಜಲಸಂಧಿಯ ತೀರ ಪ್ರದೇಶಗಳನ್ನು ತಮ್ಮ ಹಿಡಿತಕ್ಕೆ ತೆಗೆದುಕೊಳ್ಳಲು ಯತ್ನಿಸುತ್ತಿದ್ದು, ವಾಣಿಜ್ಯ ಸರಕು ಹಡಗುಗಳ ಮೇಲಿನ ದಾಳಿಯನ್ನು ಮುಂದುವರಿಸಿದ್ದಾರೆ.
ಹಾರ್ಮುಜ್ ಜಲಸಂಧಿಗೆ ಪರ್ಯಾಯವಾಗಿ ಸೌದಿ ಅರೇಬಿಯಾ ಬಳಸುತ್ತಿರುವ ಈಸ್ಟ್-ವೆಸ್ಟ್ ತೈಲ ಪೈಪ್ಲೈನ್ ಮೇಲೂ ಇರಾನ್ ಬೆಂಬಲಿತ ಸಂಘಟನೆಗಳ ನಿರಂತರ ದಾಳಿಗಳು ಪರಿಣಾಮ ಬೀರುತ್ತಿದ್ದು, ಮೆಕ್ಕಾ ಸಮೀಪದ ಇತ್ತೀಚಿನ ಡ್ರೋನ್ ದಾಳಿಯು ಇಡೀ ಗಲ್ಫ್ ವಲಯದ ಭದ್ರತೆಯನ್ನು ಮತ್ತಷ್ಟು ಬಿಗಡಾಯಿಸುವಂತೆ ಮಾಡಿದೆ.
ಹೆಚ್ಚಿನ ಸುದ್ದಿಗಳಿಗಾಗಿ Power TV ಜೊತೆ ಇರಿ.
